Organizaciones ecoloxistes van axuntase en Salave nel Día Mundial del Mediu Ambiente

|

Esti domingu ye’l Día Mundial del Mediu Ambiente y les organizaciones ecoloxistes van celebralo, como ye vezu, con una aición de denuncia. Nesta ocasión escoyeron Salave n’apoyu a la Plataforma Oro No.
 
Esti coleutivu defende tola zona de la Llaguna de Silva, en Salave (Tapia), amenazada pol proyeutu d’una mina d’oru y por otres presiones urbanístiques, “al igual que tola costa asturiana”, aseguren dende les organizaciones ecoloxistes que participen na celebración del Día Mundial del Mediu Ambiente. Éstes son la Coordinadora Ecoloxista d’Asturies, el Colectivo Ecologista de Avilés, el Grupu d’Ornitoloxia Mavea, l’Asociación para la Defensa Jurídica del Medio Ambiente ULEX, Ecoloxistes n’Aición d’Asturies, l’Asociación Ambiental Ecos Astures, l’Asociación Asturiana de Amigos de la Naturaleza (ANA), Amigos del Tejo y las Tejedas, Salternavia, l’Asociación Medioambiental La Cirigueña, SOS Cuideiru, la Coordinadora Ornitolóxica d’Asturies y Greenpeace.
 
“La mina d’oru en Salave ye yá una vieya aspiración de les multinacionales –caúna heredera de la anterior– dedicaes a la esplotación d’esi metal preciáu. Un proyeutu col qu’intenten xenerar esperances ente la población pa ganar el so apoyu, ufiertando cientos de puestos de trabayu y millones d’euros de beneficiu pal conceyu”, señalen dende estos coleutivos. Pero la verdá suel ser otra, porque “tenemos la esperiencia de les falsedaes que resultaron de promeses similares n’otres esplotaciones d’oru asturianes, como Balmonte y Salas, onde una vez sacáu’l beneficiu dexen la hipoteca de los residuos y los espacios ensin restaurar”, continúen.
 
Entes les afeiciones negatives que produciría la estraición del oru taríen, amás de la degradación paisaxística nun espaciu natural protexíu, “el riesgu de contaminación xeneráu polos lixiviaos cianuraos y los vertíos de la escombrera del mineral, la contaminación atmosférica y ruíos que provocaría’l funcionamientu de la maquinaria y l’aumentu de tráficu de vehículos pesados, asina como l’apertura de pistes d’accesu y movilidá pa la esplotación. Tolos coleutivos que van participar nesta xornada reivindicativa’l domingu faen un llamamientu a la población asturiana pa que vayan hasta Tapia pa celebrar el Día Mundial del Mediu Ambiente xunto a ellos y protestar contra esti proyeutu d’estraición d’oru en Salave. L’actividá va principiar a les 12 hores y va consistir nun percorríu didáuticu pela zona afeutada pol proyeutu.

Contador Estadistiques