Organizaciones asturianes refuguen asistir a unes xornaes sobre normalización en Galicia

La selmana qu'entra celébrense en Ribadeo na Escuela "Fermín Penzol" unes xornaes d'estudiu qu'entamen la vicerrectoría de Rellaciones Esteriores y la Conceyalía de Cultura de Ribadeo. Dende'l 28 al 30 d'ochobre van tar nestes xornaes representantes de servicios de Normalización Llingüística gallegos y de les universidaes gallegues nun alcuentru que va inaugurar l'escritor asturianu Xuan Bello, cola ponencia "Historia de dos hemanes y un llobu malu". La nueva responsable de política llingüística de Galicia, Marisol López, va falar dempués del autor de Paniceiros pa adelantar dellos aspectos sobre'l Plan de Normalización del gallegu.

Ello ye que la xornada del sábadu 29 tien de dedicase a una mesa redonda sobre "les normalizaciones pendentes en Galicia y Asturies" con representantes de la Mesa Pola Normalización do Galego y de la Xunta Pola Defensa de la Llingua Asturiana. Esta mesa y otra más entitulada "Estandarización y normalización de les fales del Eo-Navia" nes que taba prevista la participación de representantes de Xeira, l'asociación de defensa del Gallego-asturianu, nun van contar cola presencia de los representantes de la parte asturiana. Xeira y la Xunta, que recibieren el convite p'asistir a estes xornaes que se presentaron dende la universidá de Galicia como un puntu d'alcuentru y pa poner esperiencies en común, refugaron l'asistencia les mesmes. Representantes de la Xunta Pola Defensa de la Llingua Asturiana comentaron a Asturies.com que la selmana qu'entra van dar una rueda de prensa conxunta con Xeira pa esplicar los motivos que-yos llevaron a retirase d'estes xornaes.
.