Organicen un actu contra’l gastu públicu de la visita del Papa

“La visita’l Papa ¡Non colos mios impuestos!”. Baxo esi nome va convocase un actu laicista en Xixón nel que se refuga que perres públiques financien les visites del Papa al Estáu español.

El Papa Benedicto XVI va visitar Barcelona’l 6 de payares y Santiago’l 7 de payares. Amás, tamién va pasar per Madrid en 2011 pa la “Xornada Mundial de la mocedá cristiana”. Perres públiques financien parte d’estes visites, polo que dellos sectores laicistes amuesen el so rechazu.

“El mesmu gobiernu que fai por imponer los recortes sociales decidió que l’Estáu gaste millones d’euros pa pagar los viaxes y la fachenda d’esti señor”, denuncien dende Asturies Laica a la par qu’añaden que “la ciudadanía nun tien por qué pagar les visites y viaxes pastorales de quien vien a predicar y esparder doctrina”.

Por ello, Asturies Laica convoca’l domingu 7 de payares, a les 12 la mañana, nel paséu de Begoña de Xixón, un actu laicista contra’l gastu públicu d’esta visita relixosa. L’actu ta sofitáu per delles organizaciones d’Asturies ente les que s’alcuentra’l Bloque por Asturies y SUATEA.

Visiones estremaes
Tamién Asturies Laica amuesa fondes discrepancies colos puntos de vista de la xerarquía católica oficial. Critica que’l Papa refugue la igualdá ente homes y muyeres, condene’l divorciu, l’albuertu, el matrimoniu homosexual y preservativos, ente otros. Amás, denuncia que nel Estáu español la Ilesia nun paga impuestos y que’l Estáu “da-y a la ilesia tolos años más de 10.000 millones d’Euros”.