Ondó gana’l concursu d’escanciáu del Festival de la Sidra Natural de Xixón

|
Ganadores prueba d'escanciáu de Xixón

El XXVI Festival de la Sidra Natural de Xixón llega al so tramu final, onde s’entamen les actividaes principales, como’l récor mundial d'escanciáu simultaneu o la preba de sidra. El xueves celebróse’l concursu d’echadores, que llevó’l ecuatoguineanu Salvador Ondó.

L’escanciador de la sidrería xixonesa El Otru Mallu foi’l meyor ente los 45 competidores d’una prueba que tuvo llugar na Plaza Mayor énte numberosu públicu. Esta importante participación, la más alta de la historia en Xixón, allargó la prueba per cuatro hores hasta les nueve de la nueche.

El segundu clasificáu foi  Jeison Franco, de la sidrería El Madreñeru, de La Pola Siero, mentes que’l terceru foi’l Jorge Vargas, tamién de les sidreríes El Mallu. Con esti trunfu, Ondó algama’l lideratu provisional del Campeonatu Oficial d’Escanciadores d’Asturies, que llevó na edición del 2016.

Traca final

El certame sidreru xixonés, el más importante del país xunto col de Nava, comenzó’l sábadu pasáu cola apertura del Mercadín de la Sidra y la Mazana nos Xardinos de la Reina, con actividaes a lo llargo de tola selmana, pero guarda pa estos trés díes últimos los eventos de más repercusión. Asina, esta tarde, sobre les 20.30 hores, va intentase batir un récor nuevu d’escanciáu simultaneu na sablera d’El Natahoyo, pa lo que se necesita la presencia de 8.565 persones.

Mañana, a les 21 hores, van entonase los cantares de chigre en comuña na Plaza Mayor, mentes que na mañana del domingu, de 12 a 15 hores, va celebrase la tradicional preba de sidra.

Na semeya, Ondó –nel centru– echa un culín xunto colos otros clasificaos ente los cinco primeros.

Contador Estadistiques