Onde l'aire quiera llevalo

La marea negra pasa agora a sesenta milles de la costa asturiana, pero esti fin de selmana pue ser clave pa saber si acabará posando nes nuestres playes o si va pasar de llargo. Too depende de pa onde l'aire quiera llevalo. La previsión diz que pa güei vamos tener Oeste-Noroeste soplando a 18 km/h, que ye lo peor que podía pasar, rolando mañana sábadu a Oeste de 13 km/h pa tornar el domingu a soplar de sur, que ye lo que ta, de momentu, quitando de que pase una desgracia. Con too y con ello, dende'l serviciu de coordinación del 112 yá tan avisando a xente que teníen apuntao pa dir de voluntarios en previsión de lo que pueda pasar esti fin de selmana.

Otramiente, el galipote n'alta mar ta dañando a les colonies de páxaros, y estos díes ta repuntando la cantidá d'aves qu'ingresen a los centros de tratamientu, onde entovía queden con vida y a tratamientu más d'un cientu de páxaros de los que foron llegando dende qu'entamare la marea negra. Anque paeza que'l tantu per cientu de páxaros que llibren ye pequeñu, ye normal nestos casos que nun se rexistren supervivencies perriba del 20%, y, de fechu, el métodu col que tan faciéndose los tratamientos ta valiendo pa que sobrevivan más de los que se contaba.

Na semeya de satélite del día 22 qu'acompaña a esta noticia vese lo ye bien fácil que seya una mancha en forma de "L" al revés espurriéndose énte la costa asturiana. Lo otro que se ve escuro son reflexos y fenómenos atmosféricos. Más información nel web especial de la Universidá d'Uviéu