Oi! N’Ast reedita’l so trabayu ‘Sangre y fierru’ en formatu vinilu

L’únicu álbum de la banda Oi! N’Ast ‘Sangre y fierru’, asoleyáu nel 2002 por Guns of Brixton Records, reeditase agora, 21 años depués, en formatu vinilu. El sellu vascu ta acabante d’espublizar dos versiones del mesmu colos cantares del históricu álbum que cuenta con dos temes más nel de menor tirada pertenecientes a dos recopilatorios.

Esti discu, consideráu un trabayu icónicu dientro de la escena Oi! y folk-rock, ye la primer referencia de Guns of Brixton que, al igual que la banda, llevaba tiempu cola idea d’asoleyalu en vinilu. Agora yá una realidá en dos versiones, una en prietu y otra en splatter azul y mariellu.

Del primeru llanzóse una tirada de 400 exemplares, mentes que del segundu lleváronse a fábrica 100 qu’inclúin dos cantares más, los grabaos pal recopilatoriu ‘Kaos’ del Fondu Unitariu de Solidaridá Obrera d’Asturies (FUSOA) y el del tributu de bandas estatales a Agnostic Front ‘Gotta Go’. Entramabos tán a la venta en L’Economatu, la web musicasturiana.com y la tienda del sellu a un precio de 15 y 20 euros, de manera respeutiva.

La portada del vinilu, al igual que’l del CD, ye obra del tatuador xixonés Fu. ‘Sangre y fierru’ foi un álbum de muncho percorríu dientro y fuera d’Asturies, que permitió a la banda llevar la so música y la llingua asturiana a Francia o Suiza.

Activa dende lo último de los 90 hasta’l 2006, nel 2016 fixo una xuntanza en Xixón pa un conciertu coincidiendo col décimu aniversariu de la última actuación. Nun se descarta que se repita pa una presentación del vinilu en direuto.