Oi! n'Ast axúntase pa un conciertu con motivu del décimu aniversariu de la so separación

La formación última d'Oi! n'Ast, banda referente del Oi! n'Asturies, va dar un conciertu cola collaboración de la mayoría de los sos componentes antiguos pa celebrar el décimu aniversariu de la so actuación última. Va ser en Xixón el 30 de xunetu con Acero Condal.

"Llevábamos tiempu meditando entamar esti conciertu a los diez años de la disolución del grupu y finalmente decidímonos", esplica'l guitarrista Raúl Llope. Foi en xunu del 2006 cuando la banda tocó per última vegada, en concreto nel Llar de Keko, en La Felguera, y va ser diez años depués, en xunetu, cuando temes como 'Gausón el terrible', 'Azul y mariellu', 'La mesma voz' o 'Brenga celta' van volver a sonar en direuto.

"Va ser un conciertu únicu pal que tenemos preparaes sorpreses y nel que van participar antiguos componentes", apunta Llope, que tamién destaca la presencia de la banda d'Oi! catalana Acero Condal nesta folixa que va tener como sede la sala Sweet 01. Entovía ensin zarrar el preciu de les entraes, que va ser reducíu, sí que ta confirmáu'l día y la hora: sábadu 30 de xunetu a les 20 hores.

Conciertos dientro y fuera del Estáu

Oi! n'Ast trátase d'una de les bandes asturianes qu'empleguen la llingua del país que tuvo una mayor relevancia fuera de les nueses llendes. Creada nel 1999, consiguió editar un discu, 'Sangre y fierru' (2002) col sellu vascu Guns of Brixton y participó en dellos recompilatorios, como'l conocíu '100% papel del WC' o'l 'Rock'n'Llingua'.

Nos sos siete años de vida, el grupu percorrió tola xeografía asturiana y estatal, llegando incluso a llevar la so música a Bordeu (Burdeos) y Genèva (Ginebra).