Oficialidá: Rafa Cofiño tien que correxir a Urtasun

¿Por qué'l ministru de Cultura nun defendió la igualdá xurídica del asturianu?

Sorprendía ayeri Ernest Urtasun cuando echó balones fuera a una entruga de la prensa en Mieres sobre si l'asturianu debería ser oficial. "Defenderemos les llingües cooficiales pero tamién les llingües que tienen un reconocimientu estatutariu y les daremos promoción, y de fechu yá lo tamos faciendo. El mio alcuentru cola 'Academia de la Lengua' tamién s'enmarca d'una voluntá, al traviés de les ayudes que facemos, de que se tenga en cuenta l'asturianu", espresaba'l responsable de Cultura.

Los periodistes presentes insistieron, pero'l catalán retrucó con un "yá contesté". Inclusive, hores más tarde, nun mensaxe na rede social X depués de la visita al llar de l'Academia de la Llingua Asturiana caltenía la mesma posición, ensin cita la pallabra 'oficialidá'.

Es un honor ser el primer ministro de Cultura en visitar la Academia de la Llingua Asturiana para conocer su labor y recoger sus propuestas.

Estamos comprometidos con la promoción de todas nuestras lenguas, también de las que ya están reconocidas en los estatutos de autonomía. pic.twitter.com/m6dCAZTtcV

— Ernest Urtasun (@ernesturtasun) February 21, 2024

Tuvo que salir poco depués Rafael Cofiño, diputáu y compañeru en Sumar, pa dexar, tamién en X, nidia la postura de la coalición n'Asturies: "Dende Sumar facemos una apuesta total y ensin reserves pola oficialidá de la llingua asturiana. Identidá, cultura, hestoria, presente y futuru d’Asturies. Oficialidá yá". Urtasun retuitaríalu darréu.

Un arguyu tener al Ministru de Cultura n’Asturies.
Dende @sumar facemos una apuesta total y ensin reserves pola oficialidá de la llingua asturiana.
Identidá, cultura, hestoria, presente y futuru d’Asturies. Oficialidá yá. https://t.co/GIIsgRrRY6

— Rafa Cofiño (@rcofinof) February 21, 2024

A les 13 hores ta convocada una rueda de prensa a la salida de la Conferencia Sectorial de Cultura que se ta celebrando nel avilesín Centru Niemeyer xunto a la conseyera de Cultura, Política Llingüística y Deporte, Ana Vanessa Gutiérrez, na qu'Urtasun tendrá la oportunidá d'amosar una posición más clara sobre la oficialidá del idioma.

Na semeya, Urtasun, ente l'alcalde de Mieres, Manuel Ángel Álvarez, y la conseyera Gutiérrez, ayeri na población de la cuenca d'El Caudal, onde anunció una inversión de 1,1 millones d'euros pa la segunda fase de remocicamientu del Pozu Santa Bárbara.