Ociu con raigañu esti fin de selmana en L.lena

Como cada añu, La Pola L.lena vive n’ochobre Les Feries. Nestes fiestes, l’asociación xuvenil Xunta Cultural Rebelgu, en collaboración col Conceyu, organiza un ciclu de conciertos qu’axunta música del país, grupos l.lenizos, rock y electrónica.

Blima, Skama la Rede, Los Oricios y Hachazo dan arranque’l vienres 8 a los conciertos na IV Nuechi de la Música Asturiana. El recintu, asitiáu nel patiu del Colexu Jesús Neira, va enllenase de folk, ska, rock y punk dende les 22.30.

Hardcore, punk-rock y metal aporten el sábadu cola IV Nuechi Rock. Nella, qu’emprima tamién a les 22.30, van tocar los grupos de fuera Habeas Corpus, El Último Ke Zierre y Ciclotónicos, xunto a los l.lenizos Blast Open.

Grupos locales y electrónica
La IV Nuechi de Música L.leniza y la I Nueche Llectrónica ponen pieslle’l llunes 11 a Les Feries. Dende les 20 hores actuarán les bandes l.lenizes Mokomitas, ganadores del XIII Concursu de Rock Ciudá d’Uviéu, Noche Oculta y Fermín. Depués, a les 0.30, los DJ David Mallada y Héctor Llamazares zarren la nueche al son de la electrónica.