Ocho representaciones componen la IV Amuesa de Teatru Cómicu Asturianu de Samartín del Rei Aurelio

El Teatru Municipal, en L’Entregu, va acoyer la IV Amuesa de Teatru Cómicu Asturianu de Samartín del Rei Aurelio. Ocho compañíes participen con producciones propies que se van representar toles fines de selmana dende esti sábadu y hasta’l 4 de payares.

La carauterística d’esti certame, entamáu pol Conceyu de Samartín del Rei Aurelio en collaboración cola Federación de Teatru Amateur d’Asturies (FETEAS), ye qu’axunta obres d’estilu costumista con otres más contemporánees, siempre col humor col denominador común. La Compañía Asturiana de Comedias va encargase d’abrir l’amuesa mañana con ‘La máquina de retratar’.

El restu de funciones previstes son ‘Las mujeres sabias’, de Baluarte Teatro (día 23); L’Efeutu Caparina, col Grupo de Teatro Carbayín (día 30); ‘Vatericidio’, de Teatro Maliayo (6 d’ochobre); ‘Coses del más allá’, de la Compañía Santa Bárbara (13 d’ochobre); ‘El Tonto es un sabio’, de La Capacha Teatro (21 d’ochobre); ‘Fabes’, con Teatro El Hórreo (28 d’ochobre); y ‘Por narices’, d’Irónico Teatro (4 de payares). Toes van comenzar a les 20 hores, con entraes a 4 euros anticipada (a la venta en Turquesa y la sidrería El Semáforo) y a 5, na puerta.

Na semeya, Miguel Ángel Peinado, secretariu de FETEAS; Carmen Suárez, vicepresidenta de FETEAS; María Alonso, conceyala de Cultura; y Xosé Ramón Ardines, téunicu de Cultura.