Ocho asturianos van lluchar por una medaya en London 2012

|

Esti vienres, a les 22 hores hora asturiana –21, hora llocal–, va dar entamu la gala inaugural de los trixésimos Xuegos Olímpicos de la era moderna. Un total d’ocho asturianos van pelear por tornar de Londres con una medaya.
 
Adrián López y Juan Mata –pese a nacer en Burgos, se considera asturianu– foron los primeros en debutar ayeri na competición de fútbol. Pese a ser titulares, nun pudieron celebrar un trunfu, yá que Xapón ganó a España por 1-0 nun partíu pésimu de los de Luis Milla. Pese a ser tovía favorita pa ganar una medaya, la seleición española se complica’l pasu a semifinales, yá que ye posible que se crucie cola potente Brasil en cuartos de final nel casu de pasar de segunda de grupu. Los otros dos rivales d’España son Hondures y Marruecos.
 
Otros deportes d’equipu que van tener representación asturiana son el balonmano y el ḥoquei masculín. La xixonesa Jessica Alonso, que ta acabante de fichar pol Zaječar serbiu, espera repetir l’actuación espectacular que tuvo nel Mundial de Brasil del añu pasáu, onde la seleición algamó’l tercer puestu. Esa mesma posición algamó’l combináu masculín nel Mundial de Suecia –nel Européu de Serbia d’esti añu tuvo que conformase con un cuartu puestu–, polo que Raúl Entrerríos tamién tien opciones de sumar otra medaya al so palmarés tres l’algamada en Beijing. Mentes, el xixones Juan Fernández lluchará por entrar nel podiu cola seleición masculina, qu’en Beijing algamó la plata.
 
En vela tamién va haber representación asturiana gracies a Ángela Pumariega, que va competir nel campu de regates de Weymouth en clase Elliot 6m xunto con Tamara Echegoyen y Sofía Toro. Completen la nómina d’asturianos en Londres el boxeador d’ascendencia dominicana Jonathan Alonso y el tirador Jorge Llames.
 
A repetir l’oru de Samuel Sánchez
 
Estos ocho deportistes viaxaron a Inglaterra pa tratar de repetir la fazaña de Samuel Sánchez en Beijing 2008 –ciclista que nun va poder competir nesta ocasión por nun tar recuperáu d’una caída– y xubir a lo más alto del podiu. Nos Xuegos Olímpicos celebraos en China tamién algamaron metal los hermanos Entrerríos y Rubén Garabaya, nesti casu de bronce.
 
Hai que destacar que’l primer asturianu en conseguir una medaya foi Pedro Pidal, Marqués de Villaviciosa, en Paris 1900 na modalidá de tiru al pichón. El Comité Olímpicu Internacional (COI) nun reconoz la medaya del noble nacíu en Somió al ser una prueba con recompensa económica, anque pal Comité Olímpicu Español (COE) ésta si ye válida y la recueye como la primera del deporte estatal nuna cita olímpica.

Contador Estadistiques