Ocho agrupaciones van participar na XXVIII Muestra Folklórica Internacional de Llugones

El sábadu va tener llugar una edición nueva de la XXVIII Muestra Folklórica Internacional de Llugones. Un total d’ocho grupos d'Asturies, Castilla y Paraguái van participar nesti eventu entamáu pola Agrupación Folklórica La Sidrina.
 
Asina, les persones que s’averen a Llugones el sábadu van poder disfrutar de los bailles de les formaciones castellanes Asociación Folklórica Cristo de Veracruz, de Mora (Toledo); Grupo de Danzas Tierra Noble, de Las Quintanillas (Burgos); Asociación Cultural de Danzas Las Torres de Cigales (Valladolid); y l’Agrupación de Música y Danza Manuel de Falla, de Manzanares (Ciudad Real), amás del paraguayu Grupo Folklórico Alma Guaraní y los asturianos Conceyu Cultural El Carbayu (Llugones), Agrupación Folklórica y la Bandina La Sidrina (Llugones), y el Grupu de Baille La Folixa (Carreño). Toes estes agrupaciones van participar nun desfile peles cais de Llugones, dende l’avenía de Viella hasta la Casa la Cultura, que va principiar a les 18.30 hores.
 
Media hora más tarde ta previstu l’aniciu de la muestra, que va tener llugar nel salón d’actos de la Casa la Cultura. Nél van amosar los sos bailles y cultura toles formaciones convidaes a participar nesti eventu, pa depués continuar la folixa con una cena de confraternización ente los grupos.