Obres d'artistes nacíos ente'l 1930 y el 1959 conformen la esposición del Belles Artes dedicada a Conceyu Bable

Una visita guiada n'asturianu y un espectáculu poéticu-musical n'homenaxe al Nuevu Canciu Astur son les otres contribuciones del muséu pa la XVL Selmana de les Lletres Asturianes.

Esti meudía inauguróse 'Conceyu Bable y l'arte asturianu contemporaneu', esposición entamada pol Muséu de Belles Artes d'Asturies na sala 24 de la instalación. Ye "una reordenación" de los sos fondos con obres d'artistes asturianos nacíos nes décades de los 30, 40 y 50 que trabayaben nel país nos 70 "nun exerciciu de diálogu cola asociación Conceyu Bable, de la que se cumplen cincuenta años de la so nacencia".

En total son 34 pintures y escultures, de les que 11 s'esponen namás pa esta muestra, que se van poder visitar hasta'l domingu 12 de mayu. Esta tarde, a les 18 hores, los ciudadanos que s'averen van poder disfrutar d'una visita guiada n'asturianu a la mesma.

Darréu va desenvolvese un espectáculu poético-musical n'homenaxe al Nuevu Canciu Astur cola particiapción de Xaime Martínez y La Familia Tradicional, Mapi Quintana, L-R y Izar Gayo. Tien confirmada la so asistencia Antón García, direutor xeneral d'Aición Cultural y Normalización Llingüística, qu'acompañara pela mañana na inauguración de la esposición a Alfonso Palacio, direutor del Muséu de Belles Artes d'Asturies.

Na imaxe, parte de la esposición. Semeya propiedá del Muséu de Belles Artes d'Asturies.