Núñez Feijóo recibe’l primer ‘non’ y entama a correr el tiempu pa la investidura de Sánchez

El Plenu d’Investidura d’Alberto Núñez Feijóo como presidente del Gobiernu del Estáu sigue’l guión previstu. El popular algamó los 172 votos previstos na primer votación, na que necesita mayoría absoluta (176), y entama a correr el tiempu, dos meses de plazu, pa que Pedro Sánchez alcuerde l’apoyu de Junts y ERC que pasa pola amnistía.

VOX (33), Coalición Canaria (1) y UPN (1) foron los únicos apoyos colos que contó’l gallegu na votación por llamamientu celebrada esta mañana nel Congresu, por 178 en contra, nun Plenu qu’arrancó ayeri pela mañana col discursu d’investidura, siguió de tarde coles intervenciones de los grupos parllamentarios y continuó güei. Un debate nel que Núñez Feijóo nun tuvo cara a cara con Sánchez al optar los socialistes por que la réplica corriera a cargu d’Óscar Puente, que perdiera l’alcaldía de Valladolid magar ser el más votáu por un pautu de PP y VOX, mesmu casu a la inversa de lo que ta asocediendo agora na Cámara Baxa.

El vienres va entamase un alderique nuevu dende les 12.15 hores nel que’l candidatu va tener 10 minutos pa pidir l’apoyu de les diputaes y diputaos, mentes que los grupos parllamentarios van contar con 5 minutos de pallabra. Llueu va entamase una votación nueva, na que ye necesario una mayoría simple pa la investidura.

Les eleiciones seríen el 14 de xineru

El reló, sicasí, púnxose en marcha cola consulta de güei. Si’l 27 de payares, esto ye, dientro de dos meses, nun hai presidente convocaríense otra vuelta eleiciones que, daos los plazos, celebraríense’l 14 de xineru.

Enantes, el rei va llamar a consultes a los voceros parllamentarios y propondrá candidatu. Lo esperable ye que sía Sánchez, que trabaya por contar colos apoyos suficientes que pasen por un alcuerdu con Junts y ERC, partíos que reclamen como contrapartida l’amnistía de los procesaos pol 1-O.

Na semeya, Núñez Feijóo esta mañana.