‘Nun-yos tengas perceguera 2’ protagoniza una esposición en Xixón

Les ilustraciones y los testos del llibru ‘Nun-yos tengas perceguera 2’, de Sidoro Villa, formen parte d’una esposición con sede nel xixonés Antiguu Institutu. Ésta lleva’l mesmu nome del llibru infantil centráu n’animales como’l llagartu, la mosca, la pega o'l cascoxu.

L’amuesa, que ta abierta al públicu hasta’l 7 de xineru na sala 3 de la instalación, forma parte del programa ‘¡Qué cuentu tienes!’, entamada pola Oficina de Normalización Llingüística de Xixón col oxetivu de “esparder y dar a conocer la lliteratura infantil n’asturianu, afalar a los escolinos y les escolines pa que llean n’asturianu y ufiertar a les escueles materiales didáuticos al rodiu de diferentes temátiques”. ‘Pulgarina’, ‘La neña de les trences al revés’ o ‘Mansín’ son dalgunos de los títulos que yá protagonizaron una amuesa asemeyada, ensin escaecer la dedicada a la obra de Vicente García Oliva.

La de ‘Nun-yos tengas perceguera 2’ inclúi ilustraciones, testos y delles figures de la obra de Villa espublizada por Trabe nel 2016, que da continuidá a la del 2004, pa esplicar a los rapacinos y rapacines les maneres de vida y los sentimientos –que tamién los tienen– de los animales que pueblen la tierra d’Asturies. Esta segunda parte ta formada por venti llámines nes que l’autor fala del cocu la mazana, les mosques, un llagartu verde, una pega lladrona, un saltapraos coxu, un cascoxu ensin priesa, una curuxa nun cuadru, un mariscu risón, una probe raposa, aguarones, ferres, gates antroxaes, formigues o cordobeyos illustraos.