"Nun voi facer nada como conseyeru que tea fora de la Llei d'Usu", diz Alonso

|
Genaro Alonso y Alberto Muñoz

El responsable d'Educación y Cultura defende que les actuaciones que vien faciendo'l so departamentu se desendolcaron "siempre dientro del marcu que nos dimos".

Genaro Alonso presentó esta mañana'l 'Informe sobre el estado y situación del sistema educativo asturiano 2014-2015', fechu pol Conseyu Escolar del Principáu, y tres l'actu, a entrugues de los periodistes, respondió a les pallabres de Guillermo Martínez Suárez, conseyeru de Presidencia y Participación Ciudadana, del miércoles, nes qu'apuntó que les opiniones relevante d’Alonso son les que tien como conseyeru y non como filólogu, amás de recordar que l’Executivu apuesta pola normalización, tal como afita'l programa de gobiernu socialista, pero non pola oficialidá. "Tan cierto ye lo que dixo'l Conseyu de Gobiernu, que lo relevente ye lo que yo diga y faiga como conseyeru, que como tal tomé la determinación de crear y trayer a Educación la Direición Xeneral de Planificación Llingüística y Normalización. Non ensin razón, diseñamos un plan d'actuaciones nel marcu de la Llei d'Usu y Promoción del Asturianu del añu 98 pa la dignificación y normalización de la llingua asturiana, porque son dos oxetivos claros d'esta conseyería".

Darréu quixo dexar nidio –"yá lo dixi munches vegaes y voi tener que repetilo"– que la consecución de dichos oxetivos siempre va ser "nel marcu xurídicu d'esta llei y nel marcu del programa de gobiernu del Partíu Socialista, y del alcuerdu d'investidura con Izquierda Xunida. Nun fixi nada como conseyeru, y nun voi facelo nin tampoco quiero, porque'l mio compromisu ye ési, que tea fuera d'esti marcu". Por último, apuntó que toles actuaciones de la direición xeneral "recibieron un impulsu al mio xuiciu más que notable, repito, nel marcu que nos dimos", citando d'exemplu la creación del Premiu y Festival Nel Amaro de Teatru Profesional en Llingua Asturiana o Gallego-asturiano y la recuperación toponímica.

6.615 euros per alumnu

Asturies ye'l territoriu que más invierte per alumnu, con una media anual de 6.615 euros, ensin tener en cuenta al Euskadi y Navarra, suxetes a un réxime fiscal singular, y mui perriba de la media estatal, que s'asitia nos 5.231 euros. Ye'l datu principal del 'Informe sobre el estado y situación del sistema educativo asturiano 2014-2015', que tamién señala que l'abandonu tempranu de los estudios nel país ye del 16,8 por cientu, 3,2 puntos porcentuales menor que la media estatal.

Na semeya, Alonso y Alberto Muñoz, presidente del Conseyu Escolar del Principáu.

Contador Estadistiques