Nun van almitise pareyes homosexuales na boda vaqueira d’Aristébanu

L'Asociación qu'organiza'l "Festival Vaqueiru y de la Vaqueirada" que se fai n'Aristébanu (Valdés) cada mes de xunetu abrió esti xueves el plazu pa que s'apuntaren les pareyes que quixeren participar na tradicional "boda vaqueira" escenificación del casamientu tradicional ente los miembros d'esti grupu social de ganaderos treshumantes. Na convocatoria diz que nun van almitise más que pareyes heterosexuales, dalgo que dende'l colectivu Xente Gai Astur (Xega) vese como "una manifestación d'homofobia mazcarada de respetu a les tradiciones", según declararon a Asturies.com representantes d'esta asociación.

El 30 de xunetu ye'l día en que l'Asociación d'Amigos del Festival Vaqueiru va llevar alantre otra edición más del tradicional festeyu que dende 1965 remocica la tradición del grupu social vaqueiru, qu'enraigonen nel sieglu XIV bien d'elles. El ritu central del día ye la tradicional boda vaqueira, un ritu pol que tolos años se casa una pareya na Braña d'Aristébanu. El ritual entama col cortexu de los novios, padrinos y convidaos, que van camín del llugar de la ceremonia tres d'un carru del país tiráu por gües, nel que va l'axuar, qu'incluye amás de la ropa, sacos con alimentos y la mesma cama del matrimoniu. N'acabando la ceremonia faise la típica xinta vaqueira con xamón cocío, choscu, empanada, bollos preñaos, frixuelos, postres de ñata y café.

Como novedá pa esti 2006, ente los requisitos que se-yos esixe a les pareyes que solicitaren casase pol ritu vaqueiru, la organización alvirtió que namás diba atendese a les pareyes heterosexuales. La presidenta de l'asociación organizadora , Carmen Martínez xustificó la midida como una manera de "conservar la tradición" en cuantes que nel tiempu en que se recrea la boda vaqueira yera "impensable" un matrimoniu ente dos homes o dos muyeres y que, polo tanto, nun procedía. Carmen Martínez aclarió tamién que se-yos diba dar preferencia a les solicitúes de pareyes d'ascendencia vaqueira, anque munches vegaes tien de facese la boda con contrayentes foriatos.

La negativa de l'asociación vaqueira a almitir pareyes del mesmu sexu mancó en Xega, la principal asociación de defensa de los derechos del colectivu homosexual. El Coordinador de Xega José Manuel Fernández declaró a Asturies.com que la decisión de l'asociación vaqueira ye "una clara muestra d'homofobia" y estimó que "mientres en dellos casos s'acude a la relixón pa xustificar ataques homófobos, equí llámase al respetu a la tradición" dalgo que-y abulta una "posición condenable y que nun ye democrática". José Manuel Fernández reconoz que "bien ye verdá que na época que se recrea na boda nun había matrimoniu homosexual, pero habría que recordá-y a la presidenta de l'asociación vaqueira que d'aquella les muyeres tampoco presidíen asociaciones, o yá puestos, tampoco había coches pa xubir al monte". Sicasí, el coordinador de Xega cree qu'hai marxe pa que la boda vaqueira tamién reconoza'l derechu llegalmente reconocíu de los homosexuales al matrimoniu y diz que "Esperemos que se replanteguen esti tema".