Nun va haber fútbol los llunes (de momento)

|
Nun va haber fútbol los llunes (de momento)

El xuez elimina de manera cautelar los partíos de Primera y Segunda'l primer día de la selmana, anque caltién los de los vienres.

Dos díes depués de la vista, el maxistráu del Xulgáu de los Mercantil númberu 2 de Madrid Andrés Sánchez Magro resolvió almitir de manera parcial les midíes cautelares solicitaes por LaLiga contra la decisión de la xueza única de Competición de la Real Federación Española de Fútbol (RFEF) de prohibir la programación de partíos lligueros de vienres y de llunes. Asina, hasta que decida de quién ye competencia establecer los horarios de los choques del fútbol profesional, va permitir los partíos de vienres, pero non de llunes.

La decisión, que nun contenta a nenguna de les partes, nun provoca cambios no que supón al partíu inaugural de la Lliga de Primera, l'Athletic Club-Barcelona, que se va xugar el vienres 16 a les 21 hores tres un espectáculu que va incluyir una actuación del cantante puertorriqueñu Luis Fonsi. De momento, LaLiga namái anunció los horarios definitivos de la primer xornada, na que tuvo que treslladar dos partíos previstos pal llunes al sábadu y domingu.

Cambiu nel Girona-Sporting

La modificación de los horarios en Segunda pola decisión xudicial provocó tamién dellos cambios nos partíos. Ún afeuta al Girona-Sporting, previstu nun primer momentu a les 21 hores, que finalmente pasa a xugase a les 18.30 hores.

El Deportivo-Uviéu caltiénse a les 18 hores del domingu, polo que los aficionaos de dambos equipos nun van poder siguir na so totalidá el duelu del so eternu rival.

Contador Estadistiques