Nun trescendieron grandes avances nel primer alcuentru ente PSOE-IX-BA-LV

IX-BA-LV y la FSA-PSOE tuvieron ayeri la so primer reunión con vistes a reeeditar el pautu de gobiernu autonómicu. L'alcuentru ente les dos formaciones, que tuvo llugar na sede d'IX, foi, acordies cola valoración oficial d'esta formación "un repasu a la marcha de los alcuerdos nel ámbitu de los conceyos que se firmaren el llunes". Nun trescendió del alcuentru la primer evaluación sobre cuestiones que puen llevantar angüeñes ente les dos partes, casu del hipotéticu repartu de conseyeríes o d'asuntos como la oficialidá o l'embalse de Caliao, anque dambes partes declararon la so voluntá de "superar pequeñes dificultaes qu'afecten a un númberu llimitáu de conceyos asturianos."

Izquierda Xunida - Bloque -Verdes condiciona l'exitu de les negociaciones a tener presencia en gobiernu, descartando l'alcuersu a nivel parlamentariu que de mano llegare a proponer la FSA. De lo poco que se supo que salió del alcuentru foi un calandariu de reuniones pa siguir falando col oxetivu de que la negociación nun s'espurra más de la cuenta nel tiempu. La siguiente entrevista va tener llugar esti miércoles 13 a les 11 horas na sede de la Federación Socialista Asturiana de la Cai Santa Teresa d'Uviéu.Les próximes comparecencies énte los medios de comunicación de los partíos van facese según se rexistren avances na negociación.