“Nun soi un transfuga”, asegura Pumares

Adrián Pumares señaló que “ye una evidencia que’l pautu cola estrema derecha incomódame, pero ye un pautu municipal que n’absolutu va afeutar el mio trabayu na Xunta Xeneral”. Confesó que nun valoró dimitir pol pautu de Foro en Xixón con VOX como fixeron José Suárez Arias-Cachero 'Felechosa' y Inaciu Iglesias, a los qu’amosó ciñu y respetu.

“Depués de tar militando dende l’añu 2011 en Foro Asturias, los mios comportamientos son perfeutamente previsibles, y yo creo qu’equí namái podíen dase dos escenarios, anque na mio cabeza namái se dio ún. Entiendo qu’hubiera persones que pensaren qu’abandonar Foro Asturias yera’l camín, pero si tomase la decisión d’abandonar Foro Asturias, la decisión siguiente sería arrenunciar al acta de diputáu, porque yo nun soi un transfuga”, quixo dexar claro na intervención énte la prensa d'esta mañana nel Parllamentu.

“Cualquier persona que conoza’l funcionamientu de Foro Asturias sabe perfeutamente qu’esti alcuerdu circunscríbese al ámbitu municipal, saber perfeutamente qu’en Foro Asturies siempre hebo autonomía municipal y, poro, n’absolutu nun va afeutar al mio trabayu na Xunta Xeneral; n’absolutu va afeutar a tolos pasos que dio Foro Asturias pa convertise nun partíu asturianu con una premisa única que ye la defensa de los intereses d’Asturies y con oxetivu únicu de poner Asturies lo primero. Y nengún pautu d’ámbitu municipal va afeutar n’absolutu a esa decisión que nel congresu de refundación tomó Foro Asturies”, añadió.

Enantes, al entamu de tratar esti asuntu, valorara que “ye una evidencia que’l pautu cola estrema derecha incómódame por cuestiones de calter políticu y personal que nun escapen absolutamente a naide, pero agora bien, un pautu municipal n’absolutu va afeutar al funcionamientu de Foro Asturias nin al mio trabayu na Xunta Xeneral. Yo presenteme a les eleiciones con un compromisu mui claru: torgar que la gobernabilidá caiga nos estremos y eso ye no que voi a trabayar con llealtá al Gobiernu nome Adrián Barbón y tamién cola mayor de les esixencies. Pero ye evidente que’l pautu cola estrema derecha, la entrada de VOX nun gobiernu compartíu xenérame incomodidá”, lo que, dixo, va treslladar el miércoles 28 a los órganos del partíu na Comisión Direutiva programada.

Insistiendo na autonomía municipal pa los pautos, Pumares quixo apuntar tamién que, aparte del de Xixón, “algamamos dos alcuerdos col Partido Popular en Colunga y Ribeseya, ún que nos aúpa a l’Alcaldía y otru que nos lleva a la tenencia d’alcaldía, y tamién en Parres un alcuerdu col Partido Socialista”, que “nun afeuten n’absolutu al trabayu que yo pueda desendolcar na Xunta Xeneral”.

“Nun hai dulda nenguna nel mio compromisu cola defensa d’Asturies, cola cultura y la llingua asturianes, y nengún pautu municipal va afeutar al armazón ideolóxicu del partíu”, rescampló. Un compromisu que, na parte final de la so intervención, tamién atribuyiría a Carmen Moriyón, alcaldesa de Xixón y presidenta Foro, "que siempre se carauterizó por facer del Conceyu un ayuntamientu plural, diversu y qu'atiende a les minoríes, y eso nun va cambiar", y agradeció-y l'apoyu que-y dio cuando les valles de los contrarios a la oficialidá qu'atacaron a la so persona y "nos cuatro años últimos".

Salíes que duelen

Sobre les dimisiones d’Iglesias y Felechosa, apuntó que “hai dos planos, y ún que nun pue escaecer ye’l planu personal. Tanto Felechosa como Inaciu son amigos, bonos amigos, y entrambos acompañáronme en diferentes momentos d’esta llexislatura, siempre un apoyu, actuando con llealtá absoluta”.

“La salida definitiva d’Inaciu duelme porque ye una persona a la qu’aprecio y valoro enormemente”, siguió. Mentes, en rellación a Felechosa, vicesecretariu d'Estratexa y Comunicación, señaló que “nel planu personal afeutamente tamién enormemente porque ye un bon amigu. Nel planu organizativu creo que ye una perda tamién sensible y nel políticu, de culminase, sería tamién una perda sensible y difícilmente reparable”.

“De toes formes, y como nun pue ser d’otra manera, creo qu’hai que tener absolutu respetu pola so decisión y poles sos manifestaciones”, finó. “Encantaríame que siguiesen”, espresaría depués n’otra entruga al respeuto.