"Nun podemos pasar la vida esperando que llueva, tenemos d'actuar"

Cientos d'asturianos salieron esti martes 16 a la cai contra les quemes n'unes concentraciones auto-organizaes y descentralizaes.

Uviéu, Xixón, Avilés, Llangréu, Sotrondio, La Pola Siero o Cabrales fueron dalgunes de les poblaciones onde s'aconceyó la xente contra'l fueu que quema Asturies, Galiza y Portugal. Nelles sintiéronse frases como "Asturies nun arde, tán quemándola", "Mafia maderera fuera d'Asturies", o "Javier Fernández, responsable".

N'Uviéu lleose un documentu onde se denunciba l'abandonu y la falta de polítiques pal mundu rural por parte de los gobiernos. Indicando que la falta de polítiques que fixen la población, que dean alternatives agroganaderes nestos entornos, que doten d’un modelu productivu a los nuesos montes "ye vergoñosa". A esto, amestaben-y otros factores como yeren el monocultivu d’ocalitu, les roces y quemes controlaes que nun tán funcionando y el dexar la ganadería en manes de les subvenciones de la Política Agraria Común de la Xunión Europea, toos métodos non axeitaos a la realidá y necesidaes del país asturianu. 

El comunicáu continuaba denunciando les baxes na inversión en prevención, afuxiendo d’un control efectivu y operativu del mediu ambiente, "mirando pa otru llau" cuando la contaminación ye producía poles grandes industries y precarizando les condiciones llaborales y númberu d’emplegos de bomberos y retenes forestales. Finalizando con un pidimientu: "La ordenación del territoriu ha ser diseñada dende la puesta en valor de lo común, de lo comunal. Ha ser ordenación y non desorde, esi desorde que quieren les grandes empreses de les papeleres y la biomasa pa pescar en ríu revueltu."

Semeya de: Lluchando pola Soberanía