"Nun hai fronteres", la frase n'asturianu con opciones de sonar en Turin n'Eurovisión 2022

Tanxugueiras va participar nel Benidorm Fest col cantar en gallegu 'Terra', na que se citen estes pallabres nes diferentes llingües del Estáu.

El tríu formáu por Olaia Maneiro, Aida Tarrío y Sabela Maneiro quier frayar cola ausencia d'idiomes diferentes al castellanu nel representante de RTVE nel festival européu de la canción. Pa ello presentaron un cantar na so llingua materna, cola qu'espresen la so música, que cuenta con opciones de tar en Turin en mayu.

Nesta edición el cantar escoyíu pa tar n'Eurovisión va ser el que gane'l Benidorm Fest, una versión moderna del históricu Festival Español de la Canción de Benidorm, que se va celebrar el 26 y el 27 de xineru, les semifinales, y el 29, la final. Catorce grupos y artistes pasaron el corte d'ente los cientos presentaos, ente elles Tanxugueiras.

'Terra' ye'l cantar que van defender les gallegues, na que s'incorpora la frase 'Non hai fronteiras' en vascu, catalán, castellanu y asturianu. Asina, 'Nun hai fronteres' podría sonar nel Piemont de convencer al xuráu profesional y l'audiencia, que yá asitia a Tanxugueiras como una de les favorites pola so propuesta qu'amiesta modernidá y tradición.

Semeya propiedá de Tanxugueiras.