“Nun consiguir la reforma del Estatutu ye un fracasu y asúmolu”, afirma Barbón, que señala al PP

“Inhibióse de cualquier actitú negociadora, amosando un complexu tremendu”, reprochó Adrián Barbón a un Partido Popular (PP) “que perdió tola personalidá política”, aseguró. El presidente ratificóse esti miércoles na Xunta Xeneral na so posición de mirar a la llexislatura próxima y asumió’l fracasu por nun algamar los apoyos necesarios.

“Evidentemente nun consiguir la reforma del Estatutu claro que ye un fracasu y asúmolu, coleutivu, y asumo la parte de responsabilidá que me correspuende a min por nun ser quien a sumar los 27 votos nesta Cámara”, confesó’l socialista a Ignacio Blanco, diputáu de VOX, que plantegara esta mañana na Xunta Xeneral la entruga “¿Cuándo va dexar d’entretenos cola oficialidá y l’Estatutu pa centrase nos problemes de los asturianos?”. De siguío, “pa la xente que sía pesimista, que tenga duldes” quixo apuntar que “hai 12 años nesta Cámara sentábense 4 diputaos autonómicos que defendíen una reforma del Estatutu qu’incluyera la oficialidá de les llingües propies d’Asturies. Güei sentámonos 26”.

Nesti puntu, y llueu de señalar al PP, y como fixera’l llunes en Cangas del Narcea, volvió a poner l’horizonte en mayu del 2023, dando asina por finada la posibilidá de que nesta llexislatura pudiera retomase la negociación pa la reforma estatutaria. “Hai unes eleiciones nel 2023 y neses eleiciones los ciudadanos garrarán la papeleta d’aquellos partíos que defenden la reforma del Estatutu y, polo tanto, ente otros, el reconocimientu oficial de les llingües propies d’Asturies o garrarán la papeleta de partíos como’l de so que lo que propondrá, como propón en Castilla y León, direutamente qu’Asturies dexe d’esistir como autonomía política. Vamos ver qué prefier la xente”.

“Dende llueu, la Federación Socialista Asturiana”, siguió, “va reivindicar siempre con arguyu la identidá de ser asturianos y la identidá y necesidá de reformar l’Estatutu d’Autonomía p’adaptalu a estos nuevos tiempos, porque l’Estatutu nun caduca, pero avieya”, apuntó parafresiando a la presidenta del Conseyu Consultivu, Begoña Sesma.

Na imaxe, Barbón intervién nel Plenu, con Blanco nel so escañu en primer planu. Semeya obra d'Armando Álvarez.