Nuevu númberu de Beleños

La revista Asturies, memoria encesa d'un país, qu'edita la Fundación Belenos, ta acabante de presentar el que yá ye númberu 13 d'esta prestixosa publicación divulgativa que trata temes d'etnografía, cultura y historia Asturianes. Ente los artículos más importantes qu'apaecen nesti númberu, caberu del añu, hai que falar del Estudiu sobre la fauna asturiana nel Cuaternariu que presenta Diego J. Alvarez Laó, paleontólogu de la Universidá d'Uviéu o el trabayu sobre la Iconografía de la gaita na Catedral de San Salvador d´Uviéu que firma Tina Cuadriello.

La revista inclúi tamién coses curioses como la collaboración d'un carpinteru de la Europa nórdica que fai comparanza ente los horros finlandesos y los asturianos o l'antiguu comerciu de la ñeve dende los altos de la Gamonal hasta'l centru del país. Nun podemos finar esta reseña ensin remembrar que la revista dedicó-y esti númberu a la memoria de Federico Fierro Botas, cura xesuita y intelectual asturianista que morrió a primeros de veranu nun accidente de coche en Rusia.

Si quies mercar la revista, neto esti númberu qu'otros vieyos, pues facelo a través d'Asturshop, la tienda asturiana na rede con servidor de pagu seguru.