Nuevu númberu de la revista “Asturies, memoria encesa d’un país”

La publicación semestral qu'asoleya'l Conceyu d'Estudios Etnográficos "Belenos" presenta esta selmana'l so númberu 19. La prestixosa revista sobre temes d'arte, cultura, historia y etnografía asturianes dedica esti númberu al desapaecíu etnógrafu villaviciosín Rafael Balbín, con una alcordanza escrita pola Tertulia Cultural "El Garrapiellu".

No tocante a los artículos que s'inxeren nesti númberu 19 de la revista, amás d'un entamu que reflexona sobre'l conflictu asturgalaicu pola identidá del Navia-Eo, esta entama cola trescripción n'asturianu del discursu que diere n'Uviéu'l premiu Nobel de Lliteratura Seamus Heaney con motivu de la Selmana de les lletres 2005, pa pasar darréu a un analís de los afayos arqueolóxicos nel Castru de Tremáu Carbachu, en Conceyu de Cangas del Narcea, a cargu d'Alfonso Fanjul Peraza, David Flórez de la Sierra y Alejandro García. Pelos caminos de la historia antigua, la revista llega hasta'l del medievu con un interesantísimu artículu d'Iván Muñiz sobre les espediciones vikingues a Asturies nel sieglu IX nel que s'afonda nes implicaciones militares, polítiques y ideolóxiques d'estos fechos históricos a la lluz de los documentos que se tienen d'ello.

Cristobo de Milio Carrín ye l'autor del artículu "El robu de la copa" un estudiu nel que s'afonda nún de los mitos celtes sobre'l venceyamientu ente homes y dioses al traviés del viaxe de los primeros al país de los segundos p'alcontrar allí daqué copa o talismán de poderes máxicos. L'autor identifica n'Asturies casos de rellatos tradicionales nos que se xorrasca esti mitu atlánticu.

Los llagares tradicionales de Maliayo son oxetu del estudiu d'Inaciu Hevia Llavona, qu'espubliza un documentáu artículu con abondante información gráfico recoyendo tolos tipos de llagar y edificios y tamién les pipes y cacía que s'emplegaba. Un estudiu de Santos Nicolás Aparicio sobre los Vaqueros de Felechosa (Ayer) y los comentarios de Xabier F. Coronado al rodiu del periódicu comarcal del occidente asturianu "El aldeano" que s'editó ente 1929 y 1933 completen esta entrega de la revista "Asturies". Tampoco nun falten secciones fixes como l'estoyu de novedaes discográfiques y editoriales y la sección de semeyes antigües "memoria gráfica", dedicada nesta ocasión al conceyu de Somiedu.