Nuevos Bienes d'Interés Cultural

|
Nuevos Bienes d'Interés Cultural

L'Executivu aprobó esti miercoles 11 la declaración de bienes d'interés cultural (BIC) del xuegu de los bolos, na categoría de BIC inmaterial, y de la vía de la Carisa y el ramal tramontanu de la ruta de la Plata, lo mesmo que de los xacimientos arqueolóxicos de Picu L.Lagüezos, Monte Curriel.los y L’Homón de Faru, nos conceyos de L.lena y Ayer, na categoría de vía histórica.

El de los bolos ye'l xuegu tradicional de más relevancia na hestoria asturiana y la so pervivencia constata la so gran importancia cultural. D'orixe bien antiguu, el primer documentu conserváu onde se fala de los bolos data de 1495, algama la so mayor puxanza nel sieglu XIX y bona parte del XX. Esisten referencies sobre centenares de boleres n'Asturies, xeneralmente allugaes al pie de ilesies o en chigres.

El valor de los bolos nun se circunscribe namás al xuegu, sinón que engloba otres conocencies y actividaes profesionales y artesanales que lu arriquecen. La práctica ta fondamente enraigonada na cultura popular y apaez con frecuencia nel cancioneru, el llinguaxe coloquial, la mitoloxía, la lliteratura o la pintura. Amás, esiste una federación de bolos dende 1962 y hai decenes de peñes pol territoriu.

Pela so parte, la declaración BIC de la vía Carisa foi informada favorablemente pol Conseyu de Patrimoniu Cultural a principios del pasáu añu y, darréu, incluyir na mesma categoría de protección patrimonial (vía histórica) los xacimientos arqueolóxicos del Picu L.Lagüezos, Monte Curriel.los y L’Homón de Faru, cola so propia delimitación de redolada de protección.
 

Contador Estadistiques