Nueve candidatos al premiu al mayor estrozu mediuambiental

La Coordinadora Ecoloxista d'Asturies va entregar esti día 28 d'avientu'l premiu "Buyada Purpurina" a la persona, entidá o institución que más fixere contra'l mediu ambiente asturianu a lo llargo del 2005. Nueve candidatos se disputen esti premiu negativu que llega yá con esta a la so 13 edición, ente ellos la Viceconseyera de Mediu Ambiente, la empresa Río Narcea Gold Mines o los alcaldes de la costa asturiana.

El secretariu del sindicatu SOMA - FIA- UXT José Ángel Fernández Villa foi'l ganador d'esti premiu na so edición 2004 por proponer proyectos de gran coste mediuambiental con cargu a los fondos mineros. Anguaño, la llista de candidatos inclúi a nueve persones y entidaes, entamando pela Viceconseyera de Mediu Ambiente Belén Fernández pola so defensa de proyectos de gran impactu ambiental como la incineradora de basures, l'embalse de Caliao o los campos de golf na costa asturiana ente otros proyectos. La empresa Río Narcea Gold Mines, acusada de construyir un banzáu p'almacenar basa contaminante ensin autorización y de defender l'apertura d'una mina nueva na mesma costa asturiana en conceyu de Tapia, amás d'acusar énte los tribunales a una profesora de la Universidá d'Uviéu por criticar los sos proyectos.

Los alcaldes de la costa asturiana de conceyos como Llanes, Ribesella, Villaviciosa, Gozón, Cuideiru, Valdés y Tapia igüen otra de les candidatures conxuntes, nel so casu por consentir cola construcción de campos de golf y urbanizaciones de xalés na costa. Tamién rellacionada cola costa peron dende otra perspectiva, ye la candidatura del presidente de l'Autoridá Portuaria de Xixón Fernando Menéndez Rexach pola so defensa de la "descomanada" ampliación del Puertu d'El Musel y la instalación nel mesmu de bien de fábriques contaminantes como centrales eléctriques, xusto lo mesmo de lo que s'acusa al Conseyeru d'Industria Graciano Torre, candidatu pola so política d'instalación masiva de centrales eléctriques y llinies d'alta tensión. Poles instalaciones d'alta tensión nel so conceyu ye candidatu tamién l'alcalde de Grau José Sierra, mientres que la corporación en plenu de Cangas del Narcea apaez na llista por defender l'autovía ente La Espina y Ponferrada tarazando'l Parque Natural del Conceyu.

Candidatos que repiten tolos años na llista de la Coordinadora son les operadores de telefonía móvil pola instalación masiva d'antenes ensin cumplir les normatives y tamién el Presidente Asturianu Vicente Álvarez Areces, al que la Coordinadora Ecoloxista responsabiliza de llevar alantre una "nefasta política ambiental".