Nueve artículos de diferentes temátiques y trés reseñes conformen el númberu 27 de la revista ‘Cultures’

Ún artículu nuevu sobre’l llobu firmáu por Alberto Álvarez Peña abre’l númberu 27 de ‘Cultures’ y da continuidá al tema principal del anterior. Otres ocho investigaciones sobre diferentes campos y trés reseñes completen esta publicación de l’Academia de la Llingua Asturiana (ALLA) que dirixe Roberto González-Quevedo.

Yá ta disponible nes llibreríes del país y na de la institución académica el nuevu ‘Cultures. Revista de Cultura Asturiana’, númberu non monográficu que, sicasí, sigue enantándose temátiques yá trataes en númberos anteriores. Ye’l casu del llobu, al que se-y dedicaben trés artículos nel anterior.

Agora preséntase ‘Un averamientu personal al llobu y la problemática de los daños al ganau’, que firma Álvarez Peña. Tamién hai güecu nesti exemplar pal estudiu de la lliteratura oral tradicional y la so trescripción nel sieglu XX, les creyencies y rituales en Palacios del Sil, los remedios melecinables pa les malures de los güeyos o la reflexón sobre’l llugar d’Asturies nel paisaxe sociocultural contemporaneu.

D’igual forma recueye collaboraciones qu’estudien les práutiques de l’arqueoloxía agraria, l’asturianu na documentación medieval nel monesteriu de Santa María de Lapedo (Balmonte), les figures y personaxes venceyaos al sector ganaderu na zona del Navia-Eo nel sieglu pasáu y un analís de delles práutiques específiques na collecha de la mazana y el so por qué. González-Quevedo (‘Los cuentos asturianos de de Constantino Cabal’ y Manochu de creencia’); Javier Fernández Conde (‘La llingua asturiana na documentación de Santa María Lapedo, Balmonte’); Margarita Fernández Mier y Luis Miguel Flecha (‘Los estudios de les comunidaes llocales nun marcu globalizáu’); Martín de Villar (‘Manual de rexistrador’); Dani García de la Cuesta (‘De por qué se dexen mazanes na pumar’); Xuan Pedrayes (‘El paisaxe cachopu: perceición y realidá del país y de los so paisaxes’); y Álvarez-Peña (tamién con ‘Melecina máxico-tradicional pa la malura de los güeyos’) son los autores que publiquen los sos trabayos nesti númberu.

Zarren la revista les reseñes de les obres ‘Enciclopedia de los juegos y deportes tradicionales de Asturias’, de Gerardo Ruiz y Marta Ruiz Ramos, por Carlos Suari (entitulada ‘Enciclopédica collecha de tradición xugada’); ‘¡Cóntos contos!, 101 del occidente d'Asturias’ y ‘Había úa vez’, entrambos de Martin de Villar, por Álvarez Peña (‘Realcuentru cola dignidá del patrimoniu oral’); y ‘La flauta del sapo’, edición de María Jesús Ruiz de la obra d'Alejandro Casona, ilustrada por Fererico Delicado, que fai Paco Ramos (‘Un libro escrito hacia la infancia’).