Nueche folk nel Teatru Xovellanos

Esti vienres el Teatru Xovellanos de Xixón ufierta una sesión con dos grupos de folk, ún gallegu y otru asturianu. Per un llau va tar la orquesta folk gallega SonDeSeu, y pel llau asturianu los veteranos Lliberdón.

SonDeSeu ye un proyectu musical que ñaz nel Conservatoriu de Música Tradicional da Escola de Artes de Vigo. La orquesta fórmenla alumnos y profesores del propiu conservatoriu hasta llegar a un númberu de 35 componentes, ente arpes, gaites, percusión, vigulinos, voces, zanfones y xiblates. El so repertoriu ye una mezcolanza ente lo tradicional y composiciones de los propios alumnos y mayestros, ente los que rescampla la presencia del antiguu miembru de Milladoiro y personaxe fundamental na historia del folk en Galicia l'arpista Rodrigo Romaní. La banda gallega va compartir escenariu con Lliberdón, el grupu de folk de Xixón con trés discos nel so haber, y que dende l'añu 1986 podemos velu peles nueches folk n'Asturies. El conciertu ye esti vienres día 19 a les 20:30 hores nel Teatru Xovellanos de Xixón.