Nueche Folk en Ciañu

Mañana vienres entamen les fiestes del Corpus en Ciañu, y van facelo cola tercer edición de la Nueche Folk de Ciañu, que tien previstes les actuaciones de la Banda de gaites del Conceyu Llangréu, del grupu folk "Niundes", conxuntu llaniscu que ya participare nel discu IV Xeneración folk de "L'Aguañaz", y que tan acabantes d'incorporar a la formación a l'antiguu xiblateru de "Felpeyu" Isidro Suárez.

Nesti conciertu tamién vamos poder ver a "Cave Canem", grupu que lleva poco tiempu furrulando y que ta formáu por músicos bien conocíos na escena musical asturiana, ente ellos dos ex-Folkgando como son Lluis Rodríguez col baxu y Paula Alonso col vigulín, Daniel Lombas, antiguu componente de "Llan de Cubel" y anguaño con "Bron" y "La Bandina'l Tombo" ta na batería, y Rubén Martínez coles xiblates, anque'l nome que más rescampla ye'l del guitarrista Rafa Kas. El guitarrista de Xixón, que foi músicu pa xente como "Ilegales", "La Unión" o "Los Toreros Muertos", y que nel so momentu ya anduvo averáu al folk collaborando con "Beleño", participa agora d'esti proyectu.

Según nos comentó a Asturies.com la vigulinista Paula Alonso, Cave Canem (en llatín "curiáu col perru") son un grupu con un soníu que pue paecese daqué a "Gwendal", con munchu xuegu melódicu y apostando muncho más poles composiciones que poles igües sobre temes tradicionales. Pa zarrar la nueche va tar el grupu por escelencia del rock n'asturianu, "Dixebra". El llugar del conciertu va ser el parque de Ciañu y entamará a les 23:00 hores.

Dende Asturies.com queremos informavos tamién qu'esti domingu vamos dar anuncia de los conciertos más importantes que se preparen pa esta nueche de San Xuan.