Nueche Folk de Parres

Arenes de Parres acueye esti fin de selmana la "1ª Folixa Celta d`Arenes de Parres".

L'asociación "Llar de Sones" entama esta nueche folk como una más de les actividaes qu'organiza a lo llargo del añu. L'asociación yá organizó va unos meses un conciertu contra la guerra n'Iraq onde tocaron ente otros "Trinchera", "Los Ermitaños del Rio", o "Mala Reputación", amás tamién organizaron el primer concursu de Relatos Curtios (en castellanu y asturianu) "Hestories de Les Piragües".

Agora volvieron a ponese manes a la obra cola música y prepararon un bon programa pa la nueche y la tarde del sábadu 27. A partir de les de les 19:30 va haber tonada col cantante Jose Luís Valle acompañáu pol gaiteru ganador d'un Macallan Oscar González. Pa les 20:30 ta reservada una prestosa iniciativa, la llamada "Tarde en Danza". Octavio Trapiella, curdionista de "La Bandina" va ser l'encargáu de llevar alantre esta actividá na que va intentáse animar al públicu a echar un baille d'una forma senciella y prestosa. A les 22:30 hores entamará la nueche folk con tres actuaciones. Primero va actuar "Xente de la Banda de Cabrales", esti descriptivu nome representa exactamente lo que diz. Delles persones que tocaben na yá desapaecía Banda de Gaites de Cabrales xuntáronse pa facer una bandina, y esta va ser la so primer actuación. Dempués llega una bandina con algo más d'esperiencia, Santi Caleya, Merce Santos, Octavio Trapiella, David Varela y Pablo Pumarada, "La Bandina", preparen la nueche pa que'l baille seya'l mayor protagonista. Pa zarrar la nueche folk van tar "Batulax", col so folk-rock, ye dicir, fuercia p'acabar con esta 1ª Folixa Celta d`Arenes de Parres.

Pal sábadu hai otra posibilidá en cuantes a folk, "Tejedor" va dar un conciertu acústicu a les 19:30 nel Fórum de Fnac Principado. Esti conciertu sirve como despidía de la temporada veraniega de conciertos de la banda asturiana.