Novedaes nel SIMO

El puestu del Institutu de Desarrollu Económicu del Principáu d'Asturies nel SIMO TCI de Madrid, la feria d'internet y nueves tecnoloxíes más importante del estáu, atecha esti añu a un total d'ocho empreses asturianes que van tar hasta güei enseñando los sos productos y aplicaciones. La feria d'esti añu tien un total de 806 espositores, y yá ta afitada como la tercera más importante d'Europa, anque los organizadores nun dexen de reconocer que esti ye l'añu de la crisis nel sector y que les empreses tan vendiendo poco.La presencia asturiana esti añu espoxigó sobre la del 2001, cuando tuvieron seyes empreses del país (Treelogic, Idp Soft, Hispatec, Seresco, Espiral y Inventa) Nesta edición repiten les cinco primeres y preséntense por primer vez Incuvatic, Entec y B2B Integral . La primera ye en realidá el ñeru d'empreses del polígonu Valnalón en Llangréu, mientres que la segunda ye'l resultáu de xuntase delles empreses d'inxenieria informático del Parque Científicu de Xixón. Pela so parte B2B apurre conexón y servicios telecomunicaciones pa empreses y profesionales. Aparte de la presencia asturiana nel mundu de les empreses d'aplicaciones informátiques, el Simo ye l'escaparate nel que s'enseñen les novedaes más llambiones del mercáu informáticu y tecnolóxicu. Axendes electróniques, nuevos ordenadores portátiles, cases intelixentes y caxigalines de duldosa utilidá pero qu'acaben siendo noticia polo rares que son, como la primer cadena hi-fi con conexón a la rede en banda ancha o (yá más amañosos) los nuevos Tablet Pc, una evolución del portatil que desanicia les tecles, poniendo en cuenta d'elles una pantalla na que l'usuariu puede escribir con un punteru y que se presenten énte'l gran públicu nesti Simo. Anque Microsoft presenta tamién bien de novedaes, lo cierto ye qu'esti Simo quier ser el de la popularización del sistema Linux, más baratu pal usuariu que los productos de la casa de Redmond y del qu'esisten bien de versiones distintes, arriendes d'una evolución contínua gracies al trabayu d'informáticos de tol mundu. Pa que la xente lo conoza y vaya averándose a ello, l'asociación Hispalinux tien ún de los puestos más visitaos de la feria. Otramiente, la gran estrella de la feria ye Hewlett Packard, qu'ocupa un pabellón enteru de los ocho que tien el SimoLa fotografía díxital tamién ye otra estrella del Simo, lo mesmo na estaya de máquines de retratar que na d'impresores especializaes. Tres l'anuncia va pocos meses na Photokina de Colonia por parte de les cases Olympus y Kodak del nuevu estandar 4/3 pa fotografía dixital, que va igualar muncho les característiques de les cámares, nesti Simo la casa Sony presenta una impresora por sublimación de tinta qu'anuncia resultaos espectaculares na reproducción de les semeyes. Anque ta andándose muncho nesta estaya, la fotografía dixital sigue ensin baltiar a la clásica en calidá, anque la novedá d'esti mercáu y la saturación del de cámares clásiques lleva a que la venta de cámares dixitales espoxigue en progresión xeométrica.