Novedaes editoriales

Coplas vaqueiras, obra del cantautor y investigador de la cultura asturiana Rafael Lorenzo, abre la riestra de novedaes de la editorial asturiana, que tamién presenta estos díes "Porticu" poemariu de Marta Mori que ganó la edición 2.003 del premiu de poesía "Teodoro Cuesta" de l'Ayuntamientu de Mieres. Lluís Fano, cola obra "República de les yerbes altes" completa esti tríu de novedaes

Rafael Lorenzo, al que'l públicu yá conoz como cantautor dende los años 70 presenta Coplas Vaqueiras, un títulu complementariu al discu col mesmu títulu qu'anda presentando estos meses y que l'autor define como "una paciente recopilación de munchos años", peles brañes d¹Asturies y falando colos vaqueiros y vaqueires que tovía guarden como un tesoru les sos tradiciones. El llibru ta ordenáu por temes (la braña, la xente, el ganáu, amoríos, casorios, vieyos, cures y flaires, el ramu, el cantar etx) y lleva un prólogu del antropólogu Roberto González-Quevedo.

Pela so parte, el "Porticu" de Marta Mori (Xixón, 1965) que yá se presentó esta selmana nel Salón del Llibru Iberoamericanu, defínese como un llibru de corte intimista, y iniciáticu, onde los grandes temes de la poesía universal, como la vida y la muerte, o l¹amor alcuentren
una voz tomada pola ausencia y la señardá, pero onde la reflexión y la serenidá de la madurez creativa ganen la partida. Esti llibru ye¹l primeru qu'espubliza l'autora, profesora d¹Institutu y de la Universidá d¹Uviéu.

Tamién ye nuevu no d'espublizar poesía Lluís Fano (Mieres, 1961) que con "República de les
yerbes altes" quier dar testemuñu de la condición humana nel nuestru tiempu con una estética que bebe de la tradición figurativa d'últimos del sieglu y de los poetes americanos de la xeneración «beat».