Novedaes editoriales

Xandru Fernández vuelve a les llibreríes cola novela "Les Ruines". Editada por Trabe, esti llibru supón el retornu del escritor xixonés a la novela con temática d'actualidá tres de l'anterior "Los homes de bronce" na que fexo un emponderable exerciciu de novela histórica ambientada na carlistada. De fechu, amás de tratar temes más contemporáneos, "Les Ruines" ambiéntase nes cuenques mineres nes que nació l'escritor y a les que vuelve pa facer una crónica de l'Asturies de les prexubilaciones al traviés de la historia de trés hermanos.

D'otra parte, la escritora Berta Piñán presentó ayeri nel Foru Abierto de la llibrería Cervantes "Noches de incendio" un estoyu de la so obra poética escrita ente 1985 y 2002 que l'autora de Cangues d'Onís ta acabante d'espublizar cola editorial Trabe. El llibru incluye una esbilla de 50 poemes estrayíos d'otros cuatro poemarios cola particularidá de qu'agora preséntense nuna edición billingüe asturianu-castellanu. L'autora garró gran sonadía va unos meses cuando'l Príncipe d'Asturies Felipe de Borbón lleó'l so poema "Una casa" nel discursu d'entrega de los Premios Príncipe. La cita del heriede al tronu valió pa que les ventes de los sos llibros se multiplicaren nunos pocos díes.