“‘N.O.S.’ y el post-folk son actitú, pero tamién activismu; honestidá y sobre too amor pola música del mio país”, esplica Baselgas

New old stocks, coles mesmes ‘N.O.S’, “que significa lliteralmente cousas vieyas nuevas”, ye’l nome del proyeutu que taben fermentando nel so interior Leticia González 'Baselgas' y Rubén Bada, L-R, dende hai años. La panderetera esplica nesti videu p’Asturies.com lo que ye’l conceptu post-folk, cómo nació y lo que significó na so manera d’entender la música tradicional.

Tres recaudar 4.978 euros, cuasi’l doble de los 2.500 solicitaos, nuna campaña de micromecenalgu na rede pa la edición del so segundu discu, ‘N.O.S’, que va nacer a partir d’esti proyeutu, L-R ta trabayando nesti álbum tan esperáu polos sos siguidores. “‘N. O. S.’ y el post-folk son actitú, pero tamién activismu; honestidá y sobre too amor pola música del mio país”, esplica Baselgas.

No que respeuta a esta etiqueta, post-fok, “que yá esistía”, la panderetera rellátanos nel vidu cómo nació y lo que significó pa ella. “Esta pallabra convirtióse nel mio cambiu d’actitú cola pandereta, cola imaxe de la panderetera y cola sensación que yo tenía a la hora de tocar música asturiana”, espresa.

Un procesu al que-y ayudaron “persones como Llorián García, Elías García y sobre too Rubén Bada”. “Un día por fin entendí lo que yera’l post-fok y ónde taba tol misteriu. Garré una grabadora y canté un muñeira que fui improvisando nel mesmu momentu. Llaméla ‘La muñeira random’”, qu’acabaría siendo ‘Mirada moyada’.

“Nesi momentu entendí lo que yera realmente la música tradicional asturiana, lo que ye paradóxico. Dexé de ser catalizadora, dexé d’abrir la boca y que d’ehí saliera música, y fui consciente del mio cuerpu, que ye un elementu sonoru, un elementu que tien derechu a interpretar lo que canta... Fui consiciente de lo que yera la mio rellación cola música tradicional. Nun taba cantando una muñeira tradicional pero yo siguía siendo panderetera. ¿Ónde taba’l problema? En nengún sitiu”, concluyó.