Nicolás Bardio asoleya una novela d’historia-ficción entitulada ‘Cuando ensamen les abeyes’

La coleición ‘Quemando cromo’ de Suburbia Ediciones incorpora un segundu títulu. Trátase de ‘Cuando ensamen les abeyes’, una novela d’historia-ficción escrita por Nicolás Bardio, escritor asturianu afincáu en Bruxeles.

Con un estilu amenu y direutu, l'autor conduzmos a primeros del sieglu XX, cuando un hipotéticu imperiu asturianu s'alcuentra en plenu procesu de destrucción y Santo Olaya, una de les sos últimes colonies, llucha pola so independencia. Nesi ambiente d'intrigues polítiques, violencia ya traiciones, un grupu d'aventureros asturianos busquen una ayalga mítica.

Bardio esplica que, "como bon fíu de maestros, tocóme dir cola casa a cuestes d'un llau pa otru d'Asturies: Trubia, Llanera, Llugones, Llanes, Navelgas, París, Uviéu... Camiento que tengo dalgo de toos esos sitios, y si foi allá con 12 años en París cuando entamé a facer les mios primeres –y horribles– histories, pocos llugares te marquen tanto como aquel nel que naciste y aquel nel que tán enterraos los tos muertos: Uviéu y La Foz". "Camiento que foi ellí, nes charres de los güelos, onde mamé tol asturianu que sé y qu'ellos emplegaben pa falar d'un mundu qu'amodo va dexando pasu a otru", señala l’autor.