Nicanor García (C's) considera que falar d'oficialidá ye "prematuro"

El voceru del Grupu Parllamentariu de Ciudadanos, Nicanor García, considera prematuro falar de la inclusión de la cooficialidá del asturianu nuna futura reforma del Estatutu d'autonomía.

Nicanor García amosóse partidariu de siguir afondando na Llei de Promoción y Usu del Asturianu y nes midíes d'espardimientu y espansión de la llingua y cultura asturianes n'ámbitos como la educación, los medios de comunicación o les rotulaciones de la toponimia.

“Enantes de falar del tema de la cooficialidá y la reforma del Estatutu d'Autonomía, tenemos un camín entemediu que percorrer pa trabayar ente tolos grupos políticos nel sofitu al usu, l'espardimientu y espansión de la llingua y cultura asturiana. Y tenemos de faelo nesta llexislatura”, declaró Nicanor García.

Estes declaraciones foron feches dempués d'un alcuentru de la so formación cola Academia de la Llingua Asturiana.