Neolliberalismu subvencionáu

Si va quince díes saltaba l'escándalu de los millones que-y entregare'l Ministeriu de Cultura a la Fundación Francisco Franco en subvenciones, esta selmana son les fundaciones más allegaes al PP les que saquen abonda tayada del repartu institucional. La Secretaría d'Estáu de Cultura reparte 4,1 millones d'euros ente les fundaciones arreyaes a los partíos políticos en conceptu de "actividaes d'estudiu y desarrollu del pensamientu político, social y cultural". Estes perres danse al tenor de los votos de cada partíu, siendo'l PP, como nun podía ser d'otra manera, el que más lleva al través de la Fundación pal Análisis y los Estudios Sociales FAES, que recibirá, de deseparaes partíes presupuestaries, un total de 3 millones d'euros.La concesión d'estes subvenciones alumbra un poco la esistencia d'esta fundación presidida por Aznar en persona y que dende 1989 ye'l motor ideolóxicu del PP. Neto que los "think tanks" de los partíos americanos como la Heritage Foundation, esta Fundación ye'l noyu del pensamientu del PP, y d'agora en p'alantre arreya tamién a toles demás fundaciones y instituciones arrimaes al PP: Fundación Popular Iberoamericana, Fundación d'Estudios Europeos, Fundación Cánovas del Castillo y Institutu de Formación Política. Más llama l'atención el casu de la Fundación Humanismu y Democracia, que se tresforma n'ONG pa captar subvenciones al través de los fondos de cooperación al desarrollu.Ente les idegues más espardíes dende la Fundación tan la recuperación del conceptu d'España al través del "patriotismu constitucional" -con homenaxe a la andera incluyíu- La Fundación tamién marca la llinia del PP en cuestiones como'l debate ente enseñu públicu y priváu o la xestión de los servicios públicos, y punxo les blimes coles que se ficieron los cestos de la llei d'internet o la d'universidaes. La esportación de la ideoloxía que defende'l PP a l'América del Sur, ayudando ellí a partíos políticos afines, tamién ye otru de los oxetivos de la poderosa FAES.