Neños y neñes de Xixón bauticen los autobuses nuevos d'EMTUSA con nomes asturianos

Esti xueves presentáronse na Plaza Mayor de Xixón los siete autobuses nuevos qu'estrenen el diseñu 'Marea roja' que ganó'l concursu popular convocáu por EMTUSA. Dalgunos d'estos vehículos lleven nome asturianu gracies a los neños de la ciudá.

Éstos, escolinos de sestu de Primaria, tomaron parte n'otru concursu convocáu pola Empresa Municipal de Tresportes Urbanos (EMTUSA) entituláu 'Un nome pal to autobús' cola fin de bautizar los primeros vehículos nuevos que lleven el diseñu ellaboráu pol estudiu xixonés Dúo Comunicación. Asina, ente los nomes destaquen dellos asturianos como 'El Portaneños', a propuesta d'Alvaro Cancio (CP Rei Pelayo); 'Trotaxixón', d'Inés González (CP Begoña); o 'El Carru 2.1', de Javier Martínez (CP Asturies). Les otres denominaciones son 'El Gijónés' (Nicolás Alonso, CP Rei Pelayo), 'Biobus' (Miguel Díaz, CP Begoña), 'Chupibus' (María Cristina Canavás, CP Asturies) y 'Transporting' (Raúl Viyella, CP Antonio Machado).

La flota nueva d'autobuses d'EMTUSA va destinase a la llinia 15, que cubre'l percorríu ente Nuevos Roces y l'Hospital de Cabueñes. Pese a tratase d'un diseñu nuevu, que van dir incorporando los vehículos que vaya renovando la empresa municipal, nél nun hai sitiu pa la llingua asturiana, emplegando namái la forma castellana del logu de la ciudá.

Na semeya, 'El Carru 2.1'.