“Nel centru-oriente siempre hubo una tradición potente de vigulín”, recuerda Joglar

Esta fin de selmana van celebrase en L’Infiestu les primeres Xornaes del Vigulín Tradicional n’Asturies con conciertos, charres y esposiciones. La Banda Gaites LaKadarma y el Conceyu coordinen esta iniciativa, na que participen dellos coleutivos, que busca “reivindicar una realidá musical que taba tapecía y que tenía una importancia mui grande en Piloña y na zona”, apunta Rodrigo Fernández Joglar, codireutor de l’agrupación.

Parres, Cangues d’Onís, Amieva, Ponga, Colunga…, son otros conceyos con una importante presencia d’esti instrumentu. “Nel centru-oriente siempre hubo una tradición potente de vigulín”, rescampla Joglar, qu’apunta que namái en Piloña tán documentaos más de 60 intérpretes ente’l sieglu XIX y les décades últimes del XX.

“Dende LaKadarma teníemos la inquietú d’entamar un eventu de calter musical-cultural y que tuviera enraigonáu na realidá musical y cultural del conceyu de Piloña”, onde tien la sede la banda de gaites. La temática escoyida finalmente foi’l vigulín, instrumentu tradicional “que nun tuvo’l mesmu puxu na so recuperación que la gaita, el baille, la tonada o’l tambor. Quedó un poco más escaecíu y paeciónos interesante d’empobinar”.

Pa esti oxetivu contautaron colos intérpretes Dolfu R. Fernández y Rubén Bada y colos investigadores y músicos Xosé Antón Fernández ‘Ambás’ y Ramsés Ilesies, dando como resultáu unes primeres Xornaes del Vigulín Tradicional n’Asturies “pa reivindicar una realidá musical que taba tapecía y que tenía una importancia mui grande en Piloña y na zona, asina como reivindicar l’instrumentu dientro del contestu de la música tradicional a nivel xeneral y tender redes ente los instrumentistes d’otres zones d’Asturies, que tamién ye importante”. Les investigaciones entamaes permitió conocer que “a mediaos del sieglu XX cuasi tolos bailles selmanales de pueblu y munches fiestes, bodes y inclusive mises y dalguna procesión, esto yá con más anterioridá, tocábase’l vigulín”.

Acompañamientu d’un bombu

La pareya tradicional yera la de vigulín y bombu. “Atopamos testimonios de que se baillaba a lo suelto, lo mesmo que les gaites: muñeira, xota, xirandilles… Y cuando llega la moda de los bailles agarraos tócase’l tangu, empieza a tocase’l pasudoble, el valse, la rumba y tou esti tipu de repetorios”, añade Joglar.

Sobre’l por qué de la importancia nel conceyu del instrumentu, esplica que “hai testimonios de xente que punxo escuela de manera oral, enseñando d’oyíu; xente que diba a casa d’otra xente a deprender a tocar el vigulín, deprendiendo unos d’otros, anque tamién hai exemplos d’enseñances musicales al uso, apaeciendo partitures de cómo enseñaben antiguamente y testimonios de la fabricación casera d’instrumentos pa tener con que tocar cuando nun hai otra cosa. Asina hai dellos casos de vigulinos fabricaos por paisanos que trabayaben la madera, que sabíen facer ferramientes y madreñes, y que probaben pa facer un vigulín ellos tamién. Ye una realidá que nun esperábamos atopar nel 2021 y tamos ablucaos a nivel organizativu”.

Actuaciones de Caldo y ¿Aú?

Les I Xornaes del Vigulín Tradicional n’Asturies va principiar el vienres, a les 17.30 hores, cola inauguración de la esposición ‘El vigulín tradicional nel conceyu de Piloña’ na Casa de Cultura de L’Infiestu, cola intervención de Joglar y Ambás. Ésta recueye documentación algamada nos meses últimos nun importante trabayu de campu y amuesa instrumentos musicales, anques estos namás van tar espuestos hasta’l llunes magar que la instalación va poder visitase hasta’l 13 d’ochobre.

Una hora más tarde del actu, Dolfu R. Fernández va poner la conferencia ‘Acercamientu al vigulín asturianu como instrumentu de tradición popular”. Va zarrar la xornada, a les 20 hores, una xuntanza de vigulineros asturianos.

El sábadu va entamar el cursu ‘El vigulín na tradición asturiana. Repertoriu y técniques interpretatives’ nel Centru de Formación Profesional El Prial, col propiu Fernández y Bada como maestros, que va allargase na mañana del domingu. Esi mesmu sábadu, a les 21 hores, va celebrase na Piscifactoría del Orrín la entrega de premios de I Certame de Fotografía Pepe de Güela, pa dar llueu pasu a les actuaciones de ¿Aú? y los gallegos Caldo.

Nel terrén gastronómicu, una quincena de chigres de L’Infiestu van ufrir estos trés díes el ‘pinchu vigulineru’. Caún va facer una creación propia de cara a les xornaes.