“Nel Amaro yera un autor en constante cambiu más allá de les sos obres”, asegura Xandru Fernández

Esti sábadu pieslla la esposición ‘Nel Amaro-Postal/Visual’ de LLABoral Centru d’Arte y Creación Industrial, de la que s’editó un catálogu que completa los materiales de la XLII Selmana de les Lletres. “Nel Amaro yera un autor en constante cambiu más allá de les sos obres”, aseguró Xandru Fernández, comisariu de l’amuesa.

Acompañáu de la vilba del autor d’Amaro, Marta Baquero, y el direutor xeneral de Política Llingüística, Antón García, el de Turón allabó “la publicación cola que va quedar plasmada nel tiempu el conteníu d’esta esposición”. Ye un catálogu, “un tipu de llibru que tien el so públicu, y hasta ciertu puntu tamién un xéneru lliterariu”, que recueye los exemplos de poesía visual, mail art, xuegos de pallabres, manches de color, destructures, obra vertical y imáxenes de videocración y performance de l’amuesa acompañaos de munchos de los testos presentes nos cartelos y otros fechos a costafecha pa esta obra “que pretenden poner unes balices de señalización de per ónde se pue interpretar esta obra, que ye mui versátil”.

“Hai una parte del llibru que pretende ampliar la esposición”, apuntó darréu Fernández, contentu sobre manera pola inclusión de pequeños montaxes fotográficos “de poca calidá pa diseñar una esposición fotográfica, pero que dan fe d’esa faceta de Nel”. Tamién dixo tar satisfechu “sobre la imaxe de la so obra” que dexó la Selmana de les Lletes Asturianes dedicada al de Quentuserrón.

“Si dalgo saqué en claro de la preparación y la puesta en marcha d’esta Selmana ye la idea de que Nel Amaro yera un autor en constante cambiu más allá de les sos obres; ye dicir, una vez pesllada, la so obra tovía aguanta llectures, rellectures y reinterpretaciones. Podemos reescribir al propiu autor les veces que queramos”, rescampló.

“Un casu singular d’una voz que nun s’agota en cuatro o cinco claves”, siguió Fernández, “que permite organizar una esposición y reconducir esa obra nun camín determináu”. “Seguramente la seleición de la obra, la disposición de la obra, faila otra persona y salnos un Nel Amaro diferente qu’al mesmu tiempu ye’l mesmu. Estes paradoxes, amás, encaxen bien colo que yera la personalidá d’él”, apuntó.

Per primera vez, la so faceta artística

García afirmó na so intervención que de tolos materiales de la Selmana de les Lletres Asturianes “daría gran valor a esta esposición, porque en realidá la obra lliteraria de Nel Amaro, l’antoloxía de Xandru Fernández, anque acarreta materiales inéditos, lo que de dalguna manera fexo foi revisar, revisitar lo que yá conocíemos: la poesía, les obres de teatru, dalguna narración curtia… La obra más o menos conocida, pero esta faceta artística ye la primer vez que s’ofrez nuna muestra significativa, na que queden recoyíos tolos materiales que foi faciendo a lo llargo de la so vida nes distintes etapes artístiques”.

Pal responsable de Política Llingüísta ‘Nel Amaro-Postal/Visual’, que queda reflexada nel catálogu, “permítenos observar non sólo a un escritor, sinón a un artista multidisciplinar que creo que va tener un llargu camín que percorrer. Los investigadores del arte del futuru van tener en Nel Amaro una figura destacada del arte de finales del sieglu XX”, aseguró.

Pela so parte, Baquero quixo dar les gracies pol homenaxe que recibió Amaro nesta Selmana de les Lletres. “Quedé mui contenta de lo que se foi faciendo estes selmanes”, esposiciones, actos y materiales “que queden pa siempre”.

Na semeya, Fernández, col catálogu na mano, xunto con Baquero y García.