Nel Amaro, un home que dexó buelga nel mundu del arte y de la cultura asturiana

El llunes finó l’escritor y artista Nel Amaro a los 65 años d’edá, pero queda’l so recuerdu y una obra que fixo sonreir y pensar a munchos asturianos. Un home que, ensin dulda, dexó buelga nel mundu del arte y de la cultura asturiana.
 
El de Quentuserrón foi un escritor que siempre trabayó na vanguardia más absoluta y de la forma más utópica. Un suañador que foi un referente, por edá, pa tolos autores del Surdimientu na década de los 70. Nesos años tamién foi un lluchador activu poles llibertaes nuna época de dictadura, lo que lu llevó a pasar un tiempu en prisión. Ana Cano, presidenta de l’Academia de la Llingua Asturiana (ALLA), recuerda esta faceta d’Amaro que mantuvo siempre. “Foi un batallador y una persona que tuvo una trayectoria mui coherente coles sos idegues”, señala.
 
Cano destaca sobre manera la so contribución al procesu de recuperación llingüística y el gran trabayu que fixo por consolidar un teatru modernu n’asturianu, lloñe del costumismu qu’imperaba nel teatru del país. Asina, la presidenta de l’ALLA señala con un cariñu especial la obra ‘Antígona, por exemplu’, que recibió’l Premiu de Teatru de l’Academia nel 1991. Al mesmu tiempu, recuerda la participación d’Amaro en dellos númberos de Lletres Asturianes y otres publicaciones de la institución que dirixe.
 
Amaro escribió teatro, poesía y narrativa, y nos años últimos dedicóse de manera principal a la poesía visual, qu’espardía pela rede. Tolos díes espublizaba una creación nueva a los sos collacios y siguidores, a los que-yos arrancaba siempre una sonrisa dende la intelixencia. “Lo que más recuerdo de Nel yera’l so humor socarrón, punzante, irónicu...”, comenta l’artista Adolfo Manzano.
 
“Ensin grandes medios téunicos, conseguía unos resultaos perbonos gracies al usu de l’agudeza y la intelixencia”, añade Manzano, que recuerda con cariñu l’anécdota d’Amaro en Moguer cuando, na época na que se debatía’l treslláu del Archivu de Salamanca a Catalunya, “con papel y cinta cubrió la estatua de Juan Ramón Jiménez y enfadó a tol pueblu diciendo que diba llevala pa Catalunya”. Un exemplu del humor  d’Amaro, un artista que pa Manzano “nun tuvo’l reconocimientu que se merez”.
 
El tamién artista plásticu y performista Cuco Suárez tamién considera a Amaro como una persona “mui intelixente, mui contundente, con muncha ironía”, y del que se “notaba que venía de la cuenca minera”. Al so xuiciu ye'l “padre del 'performance' español y asturianu”, y como tal “tenía más reconocimientu fuera que n'Asturies, como suel pasar”. Nun sen paecíu espresóse l'escritor Xuan Bello, que define a Amaro como “un axitador, un irreverente, y una persona que nun se conformó con mires estreches, y qu'intentó dir más allá, pol so llabor como lliterariu, y tamién como artista plásticu”. Al so xuiciu, “la gran escala moral y artística de Nel Amaro nun se  reconoció en vida”. Pa él, “foi la persona más inquieta nel sen artísticu, d'aquelles persones qu'a mediaos de los 70 punxéronse al llabor de recuperar la llingua asturiana al traviés de la escritura”.
 
El también escritor, Dolfu Camilo, espresa la so rabia “pola perda d'un amigu y polo que nun se fixo con él en vida, en clave de reconocimientu a una trayectoria”. Pa él, Amaro, “ye una de les primeres voces autoconscientes del surdimientu”, al que “l'aparataxe o lobby críticu del asturianismu negó-y el pan y el sal”. Descríbelu como’l “malditu”, que “introduxo el sentir de la modernidá na lliteratura, non sólo n'asturianu, sinón también en castellanu, onde los lobbys tamién deberíen de reconocelu”. Otru artista plásticu, Ánxel Nava, recuerda la so “personalidá increíble”, y el so carauter “polifacéticu”. Al so xuiciu, foi “un creador, más qu'artista, innovador, con muncho nivel” y señaló que dende Turón, dende'l fondu de la cuenca minera, “poco se sabía que la obra d'él yera reconocida en toa España, y recientemente fixera coses en Portugal”.
 
Nava tamién recuerda dalgunos de los sos proyeutos, como la Futep (Fusión Temporal d'Empreses Performátiques), que tenía l’oxetivu de “sacar artistes asturianos al mundu”, o la Fundación Perruno Situacionista László Kovács. Acordóse también de Pulgu, el perru “situacionista” que lu acompañaba na so obra, “totalmente contracultural, contra'l sistema del arte”. “Nunca fixo pol mercáu del arte, siempre fueron esposiciones resistentes, alternatives a esi mundu de la cultura”, añade.
 
La escritora Esther Prieto apunta que “nos años 70 y 80, y al traviés de les revistes que foi editando, acoyó a muncha xente de la cuenca qu'al traviés d'él entamó a escribir o averóse a la lliteratura”, mentes que la tamién escirtora Berta Piñán destacó qu’Amaro “fixo de la so vida y de la so obra, un puntu de referencia pa xente mozo qu'entamó a escribir nos años 80”. “El so talante esprimental y acoyedor supo acoyer nesi momentu les inquietúes de la poesía asturiana, qu'intentaba topar caminos nuevos”, considera.
 
Xune Elipe, cantante de Dixebra, recuerda los años nos que coincidió con él en Conceyu Bable. “Separábase de tolo qu'había daquella, porque quería llevar la llingua asturiana como vanguardia, y pa la xente que yéremos d'Avilés, d'una zona urbana, taba en contraposición con otres cuestiones qu'había dientro de la reivindicación llingüística, más rexonalistes”, esplica. Dende'l so puntu de vista, Amaro y Dolfu Camilo –avilesín como Elipe– “marcáronmos a los qu'empezábamos col tema del asturianu daquella, porque s'alloñaben del ruralismu y la vuelta a l'aldea”.
 
Nel Amaro dexa un gran recuerdu, como pue comprobase nes muestres d’afeutu que pudieron vese na rede estos díes. En Youtube o en el blogue del ‘Club de fans de Nel Amaro’ pueden vese dalgunes de les sos creaciones y atopar más información sobre la trayeutoria d’esti escritor y artista que dexó buelga nel mundu del arte y la cultura asturiana.


Semeya cedida por Manuel Palomino.