“Necesitamos y queremos la oficialidá”, espresa Izquierda Xunida

La diputada Ángela Vallina y Víctor Suárez aconceyaron de manera telemática con representantes d’Iniciativa pol Asturianu. “Necesitamos y queremos la oficialidá”, espresaron dende Izquierda Xunida (IX) tres sentir dellos encamientos de la organización cívica, ente ellos l’entamu del procesu de reforma estatutaria.

Na axenda de la coalición ta algamar la reconocencia de los derechos de los falantes d’asturianu “nesta llexislatura”. Pa ello ye necesario reformar l’Estatutu d’Autonomía, pa lo que s’esixen trés quintos de la Xunta Xeneral, esto ye, 27 diputaos, ún menos de los que sumen los trés partíos que se posicionaron hasta’l momentu abiertamente pola oficialidá, la Federación Socialista Asturiana (FSA-PSOE), Podemos y Asturies pela Izquierda (IX-IAS).

Inaciu Galán, vocal de rellaciones institucionales d’Iniciativa pol Asturianu, qu’acompañó ayeri nel conceyu al presidente Iván Llera, incidió na importancia de siguir dando pasos nel trabayu diariu de la coalición nes instituciones pa consiguir la oficialidá. “Va unos díes treslladábemos a la FSA-PSOE qu’a día de güei danse les circunstancies pa entamar a trabayar na reforma estatutaria, y güei –por ayeri– pidimos a Izquierda Xunida siguir trabayando nesi sentíu”, apuntó tres l’alcuentru.

Los representantes del coleutivu cívicu tamién calcaron nel valir de siguir trabayando nel usu y na presencia de la toponimia tradicional y del asturianu, y recordaron que “dellos conceyos nos que gobierna Izquierda Xunida son un exemplu nel usu del asturianu, pero tenemos que siguir dando pasos allantre. Izquierda Xunida tien un pesu importante na política municipal y esa presencia tien que ser bona pal idioma”.

A nivel nacional, Llera propunxo a Vallina y a Suárez, responsable de Política Llingüística na direición del partíu, delles midíes concretes pa trabayar dende la Xunta Xeneral pa que l’idioma gane espacios na RTPA, y conseguir una presencia del asturianu nos informativos, incidiendo sobre manera na cuestión del usu oral preferencial de los topónimos tradicionales oficializaos. “Ye’l primer conceyu que tenemos con unos representantes d’un grupu parllamentariu dempués de l’aprobación del Reglamentu del usu del asturianu na Xunta Xeneral y queremos treslladar la norabona por esi pasu y animamos a facer normal l’usu del asturianu pa cualesquier intervención na Cámara”, valoró’l presidente d’Iniciativa pol Asurianu.

Vallina, Suárez, Llera y Galán.