Naz una plataforma nueva contra la llinia d’alta tensión Soto-Penagos

Asociaciones de vecinos de Nava y Piloña, xunto con grupos ecoloxistes como la Coordinadora Ecoloxista d'Asturies y los partíos políticos Asturianistes por Nava, Izquierda Asturiana y Los Verdes constituyeron esta selmana la plataforma "Conceyu contra la llinea Soto Ribera - Penagos".

El Conceyu "naz cola finalidá d'oponese a esti proyectu" y tien la intención de "paralizar la llinia" que dicen que sigue'l so procesu alministrativu "a pesar de nun tener encontu llegal y del so fuerte impactu nuna zona onde ya hai otres dos llinies de 200 KV".

La plataforma surde dempués de que se desbloquiaren llegalmente los trazaos de dellos tramos de la llinia, que dende'l Conceyu ven innecesaria en cuantes qu'Asturies yá dispón de 4 conexones eléctriques con Cantabria y 3 con Lleón peles que pasen los escedentes enerxéticos asturianos "ensin problema nengún de saturación, como reconoz Rede Eléctrica Española na so memoria". El Conceyu afirma que la única sida que s'aporta pa facer la llinia "son los proyectos de centrales térmiques a desarrollar n'Asturies" que califica de "grave atentáu mediuambiental nuna comunidá que ya ye la más contaminada d'España".

Ente los sos argumentos técnicos pa oponese a la llinia, el Conceyu afirma que delles de les variantes proyectaes nun tienen que ver col trazáu orixinal, polo que pide que se faiga otra vegada l'estudiu ambiental pa tol trazáu nuevu enteru. El Conceyu denuncia igualmente que nun s'atendió a alegaciones que llegaron a presentase, dalgo que va "contra la llexislación" al empar que califica de "irregulares" y "contrarios al interés xeneral" los convenios sobre la llinia soscritos por dellos Conceyos Asturianos pa consentir el pasu de la mesma. El "Conceyu contra la llinea Soto - Penagos" adelanten tien abierta una cuenta en Caxastur pa recibir toles aportaciones de los que simpaticen cola so causa nel númberu 2048-0074-12-0340017777 y alvierten que van coordinase colos conceyos y asociaciones d'afectaos pola llinia en Cantabria.