Naz Post Magazine, una revista cultural de baldre qu’inclúi conteníos n’asturianu y gallego-asturiano

Un proyeutu editorial novedosu ta acabante de nacer n’Asturies. Trátase de Post Magazine, una revista cultural bimestral de badre, con conteníos nes trés llingües que se falen n’Asturies, que busca interautar col llector.

Maniac Estudio Multimedia, empresa creada por Eduardo Carruébano y Pedro Núñez, ye la editora de Post Magazine, que cuenta con Iván G. Fernández como direutor de conteníos. Xente mozo que pretende impulsar un proyeutu distintu n’Asturies que sirva de plataforma pa los creadores asturianos y que nun se quede namái nel tradicional formatu físicu. Asina, la revista tien la capacidá d’interautuar col llector mediante l’accesu a conteníos esclusivos al traviés de códigos QR, como pue ser la interpretación d’un tema pa la espublización nel casu d’una entrevista a un músicu o banda. D’esta forma, los ‘smartphones’ o ‘tablets’, tán comunes yá na vida cotidiana de munchos asturianos, van ser un complementu a la llectura de Post Magazine. A ello, hai que sumar la páxina web, qu’incorpora material propiu.

Les estayes que trabaya la revista son arte/pintura, música, lliteratura, arquiteutura, cine, fotografía, diseñu, teunoloxía, tendencies y axenda. Asina, nesti primer númberu, correspondiente a los meses de payares y avientu, podemos atopar entrevistes a Xuan Bello o Pablo Moro y reportaxes que traten de los 50 años del FICXixón o del grupu de música Blues & Decker, amás d’una crónica d’un viaxe pela India de Fredy Fernández, ente otros. Un total de 64 páxines con un diseñu mui cuiráu y conteníos más qu’interesantes.

Les persones interesaes en facese cola revista –que yá se presentó nel xixonés Toma 3 y na uviedina La Caja Negra– en formatu físicu pueden atopala nos negocios qu’inclúin publicidá na mesma y en cases de cultura, biblioteques y delles sales d’arte d’Uviéu, Xixón, Avilés, Llangréu y Mieres, amás de nos campus universitarios del país.  

Na semeya, los responsables del proyeutu nun momentu de la presentación de la revista en Toma 3.