Naz ‘Chatarrona’, una serie fecha n’asturianu que s’emite per Internet

Esta selmana estrenóse ‘Chatarrona’, una sitcom fecha n’asturianu que s’emite per Internet. Cuatro actores participen nesti proyeutu entamáu por Ámbitu, ente los que s’alcuentren los ‘televisivos’ Alberto Rodríguez y Pedro Durán.
 
Escrita por Alberto Suárez y protagonizada tamién por Masokhna Diop y Juana Marrón, esta comedia “gris, urbana y contemporánea” cuenta la historia de dos collacios en paru que viven na casa de los pás d’un ellos y que ponen un anunciu na prensa pa buscar inquilinos y facer negociu ufriendo-yos la posibilidá de daprender asturianu na so estancia. Dos persones interésense pola oferta: un senegalés que trabaya nuna sidrería y quier meyorar la so vida llaboral y una asturiana castellanofalante que torna a la tierra depués de vivir en dellos paíse europeos. “Les situaciones que viven estos cuatro personaxes fain de ‘Chatarrona’ un retratu social d’Asturies, onde rescamplen los contrastes que xenera la crisis económica. La serie xuega con referencies a l’actualidá informativa, la historia de la llucha obrera nel país, los ídolos deportivos nuevos o los conflictos sociales –como’l machismu o’l racismu– col oxetivu d’esplotar un humor tan nuestro como único en mundu, al mesmu tiempu que da una visión positiva del procesu de recuperación llingüística”, espliquen dende Ámbitu.
 
De momento, na web de la serie pueden vese los trés primeros capítulos, que lleven el nome de ‘La engarrada’, ‘El sustu’ y ‘El chascu’. Trés histories prestoses que van provocar les rises de los espectadores. Hai que destacar que ‘Chatarrona’, pese a ser una serie que pue calificase ‘low cost’, ta fecha por profesionales asturianos, tanto na parte téunica como d’interpretación. Nesta estaya última, Ámbitu decidió contar con Rodríguez y Durán, perconocíos nel país poles sos actuaciones y doblaxes en ‘Terapia de Grupo’ (TPA), amás de cola frescura y solvencia de Marrón. A ellos xúnese’l debutante Diop.