Nava ye estos díes capital mundial de la sidra

Celébrase'l XL Festival de la Sidra de Nava.

Esta fin de selmana concéntrense la mayor parte de les actividaes del certame sidreru, que vien dende'l martes programando eventos. Asina, ente les previstes güei, destaca'l tornéu de bolos qu'acueye la bolera del Muséu de la Sidra a les 19 hores.

Mañana va tener llugar la primer de les verbenes, con Biorritmos (21.30 hores), Anabel Santiago (22.30 hores) y Olympus (00.15 hores), con llanzamientu de fueos artificiales a medianueche, preludiu de les dos xornaes centrales del festival. Asina, el sábadu va tener llugar la preba de sidra, la final del concursu a la meyor sidra natural fecha n'Asturies y el conceyu (12 hores), una actuación de la Banda Gaites LaKadarma (17.30 hores), el VII Festival Folklórico de Nava (18.30 hores), la entrega de premios de los concursos y la llectura del pregón a cargu de Javier Guillén, direutor xeneral de La Vuelta (20 hores), previa al chupinazu y comienzu de la 'Ruta de la sidra' poles 8 pipes colocaes en dellos puntos de la villa (21 hores).

El día va finar con una verbena con Dominó y el pinchadiscos Miguel Pika (23.30 hores). Yá'l domingu, al meudía, va disputase'l XXX Concursu Internacional d'Echadores de Sidra y XXII Festival del Tortu y, pela nueche va tener llugar la verbena última, con Nueva Banda (22 hores).

Tren pelos llagares, gran novedá

La novedá principal d'esta edición del Festival de la Sidra de Nava va ser la puesta en marcha d'un tren de baldre pa percorrer cinco llagares del conceyu. Les visites van celebrase'l domingu, de 16 a 19 hores, dende'l Muséu de la Sidra.

Por último, el llunes de tarde (17 hores) los xuegos infantiles van poner el ramu a esta edición del certame sidreru. Pue consultar la programación completa del festival calcando nesti enllaz.