Nava va agospiar unes xornaes sobre desarrollu rural

Ayeri xueves presentáronse en Nava les xornaes "Faciendo Sestaferia: participación y desarrollu rural", una actividá qu'entama la ONG de cooperación ACSUR-Asturies que pretende xenerar redes de collaboración y participación ciudadana encontándose pa ello n'asociaciones y organizaciones locales.
Roberto Porras, d'ACSUR-Asturies, sorrayó la importancia que tien dende'l puntu de vista de la so organización el desarrollu d'iniciatives d'esta triba en conceyos pequeños onde nun suel llegar estes oportunidaes de formación y debate, concentraes xeneralmente nel área central d'Asturies". La esistencia del "Oservatoriu de Priandi" una esperiencia de participación y desarrollu rural entamada pola asociación de vecinos del llugar foi lo que llamó l'atención d'ACSUR pa entamar el primer contactu que llevó a la creación d'estes xornaes
Coles que se quier "reforciar los llazos de collaboración ente vecinos y organizaciones sociales de la Comarca".


Al actu asistieron l'alcalde de Nava Claudio Escobio y Rafael Palacios, director de l'Axencia Asturiana de Cooperación al Desarrollu, organismu que financia les xornaes. Pela so parte, Mª Paz Pires, secretaria de l'Asociación de Vecinos de Priandi, agradeció la collaboración d'ACSUR y emponderó la calidá de les xornaes que dixo que van traer a Nava "delles de les esperiencies más interesantes d'España y d'Asturies en materia de desarrollu rural".

L'asitamientu de población nel mediu rural, la recuperación de pueblos abandonaos o'l papel de la muyer nel campu van ser dellos de los temes que van tratase nestes xornaes que van tener llugar los díes 16 al 18 de xunu na Casa de Cultura "Marta Portal" de Nava. Apuntase ye de baldre y pue facese llamando a los teléfonos 985 35 13 50 o 696 60 19 48 o al traviés de la web de l'Asociación de Vecinos de Priandi.