Natalio Grueso entrégase y entra na cárcel

|

L'ex direutor del Centru Niemeyer afronta un pidimientu de 11 años de prisión por irregularidaes na xestión del espaciu avilesín.

A primer hora de la mañana Natalio Grueso preséntabase na Audiencia acompañáu del so abogáu d'oficiu José René Alperi, que renunciara a la so defensa pero que va acompañalu hasta que se-y asigne otru profesional, y treslladáronlu a la Comandancia de la Guardia Civil n'Uviéu pa depués siguir hacia'l Centru Penitenciariu d'Asturies, onde va tar de manera preventiva. El principal acusáu pol 'casu Niemeyer' taba en busca y captura dende la selmana pasada por tar en paraderu desconocíu depués de que nun recibiera les notificaciones del xulgáu pal xuiciu que comienza'l llunes en nengún de los dos domicilios que diera por nun residir nellos.

La Fiscalía solicita pa Grueso una pena de cárcel de 11 años: 6 por una delitu de malversación de caudales públicos, 3 por falsedá de cuentes y 2 por insolvencia punible. Al mesmu hai que sumar un pidimientu de 24.000 euros de multa.

Xunto al que fora responsable del Niemeyer dende'l 2006, cuando foi nomáu por Ana Rosa Migoya baxo'l Gobiernu de Vicente Álvarez Areces, hasta'l 2011, añu de la inauguración del centru, tres la llegada a la presidencia del país de Francisco Álvarez-Cascos, van declarar cuatro acusaos: l'axente de viaxes J. M. V. R., al que la Fiscalía pide un total de 8 años pol malversación y estafa; l’ex secretariu de la Fundación, José Luis Rebollo, qu'afronta 2 años y 3 meses por falsedá de cuentes, al igual que la ex muyer de Grueso, nesti casu pol malversación; y l’ex xefe de producción del Niemeyer, Marc Martí, 1 añu y 6 meses, tamién por falsedá de cuentes. Presenten acusación particular nesti casu Foro y la Fundación Centru Cultural Internacional Oscar Niemeyer, que piden penes más altes.

 

Contador Estadistiques