N'Alcordanza reivindica la profesión de músicu y les actuaciones en direuto

|
Cartelu N'Alcordanza 2017

El festival en recuerdu d'Ígor Medio y Carlos Redondo concéntrase nuna sola xornada.

Esti sábadu va celebrase una edición nueva de N'Alcordanza, el certame musical que tolos años rinde homenaxe a la memoria de los dos músicos de Felpeyu finaos la nueche de San Xuan del 2006 n'accidente de tráficu cuando diben de Tresona a Catalunya a actuar. Nesta ocasión los conciertos programaos van celebrase en dos únicos llugares, La Vida Alegre y el Savoy, y nuna xornada única.

Asina, a les 18 hores van tocar na cai Bon Sucesu Felpeyu, Caldo y Os Rabizos, y LR. Mentes, nel Savoy van ufrir conciertos Seasounds, Radio Fox, Mamy Carter, Keep Karma y Últimos de Filipinas dende la medianueche.

Al igual que n'años anteriores, N'Alcordanza tamién supón una plataforma pa reivindicar aspeutos referentes a la profesión. "Nel 2017 el festival quier xunir la so voz especialmente a aquelles que vienen reclamando la normalización y llegalización de la música en direuto n'Asturies, que nes últimes selmanes convirtióse en reivindicación na cai y tema de discutiniu nes instituciones polítiques asturianes", apunten los organizadores nun comunicáu, nel que tamién reclama "una meyor considerancia, per parte de munchos sectores, del oficiu de músicu: una llexislación llaboral específica que tenga en cuenta les circunstancies especiales qu'arrodien l'oficiu de la música, asina como esaniciar torgues pa la programación de música en directu. En resume, un mensaxe que tien que llegar a les instituciones, el públicu y les mesmes persones que quieren vivir de la música".

El Toma 3 xúnese al homenaxe

Pese a nun formar parte de la programación oficial, el Toma 3 tamién quixo xunise a N'Alcordanza y programa un conciertu pa esta nueche en memoria de los dos músicos. Asina, a les 22.45 hores va actuar Un de Grao, a lo que va siguir una pinchada de Boni Pérez.

Contador Estadistiques